Elbasynyń tóraǵalyǵymen «Samuryq-Qazyna» qoryn basqarý jónindegi keńestiń otyrysy ótti
Jıynda pandemııa kezinde otandyq óndirýshilerdi qoldaý sharalary jáne «Samuryq-Qazyna» qoryn ınvestıtsııalyq holdıngke aınaldyrý máselesi qaraldy.
– Bizdiń búgingi jıynymyz kúrdeli kezeńde ótip otyr. Alpaýyt elder arasyndaǵy básekelestik pen teketires kúsheıip barady. Qazaqstan ekonomıkasyna úlken kúsh túsýde. Sonymen birge bul jańa ekonomıkalyq model qalyptastyrý úshin qajetti reformalar júrgizý múmkindigi, – dedi Elbasy.
Nursultan Nazarbaev Qordy qaıta qurý máselesin talqylaý barysynda tıimsiz ınvestıtsııalardy qysqartyp, tabysy joǵary ınvestıtsııalarǵa aýystyrýdyń mańyzdylyǵyn atap ótti.
– Biz negizgi maqsattardy Qordyń 2028 jylǵa deıingi jańartylǵan damý strategııasynda aıqyndadyq. Eń bastysy – taıaý merzimde «Samuryq-Qazyna» qorynyń jumysyn jańa formatqa kóshirip, jetekshi táýelsiz ál-aýqat qorlary sııaqty ınvestholdınge aınaldyrý. Bizge Qordyń portfelindegi aktıvterdi geografııasy men salasyna qaraı ártaraptandyrý kerek. Tıimsiz ınvestıtsııalardan arylyp, olardy barynsha tabys ákeletin ınvestıtsııaǵa aýystyrý qajet. Bul dıvıdendterdiń ósýi esebinen bıýdjetke túsetin túsimderdi ulǵaıtýǵa múmkindik beredi, – dedi «Samuryq-Qazyna» ulttyq ál-aýqat qoryn basqarý keńesiniń tóraǵasy.
Sonymen qatar Qazaqstannyń Tuńǵysh Prezıdenti daǵdarys jaǵdaıynda Úkimet otandyq bıznesti qorǵaý úshin teńdessiz sharalar qabyldaǵanyn atap ótti.
– Tótenshe jaǵdaı kezeńinde halyq pen bıznesti qoldaý, ekonomıkalyq turaqtylyqty saqtaý úshin daǵdarysqa qarsy sharalardyń úsh birdeı toptamasy qabyldandy. Biraq pandemııa báseńder emes. Onyń ekinshi kezeńi bastalyp keledi. Mundaı kúrdeli jaǵdaıda buǵan deıin atap ótkendeı, otandyq kásipkerlerge qoldaý kórsetý qajet, – dedi Elbasy.
«Samuryq-Qazyna» aktsıonerlik qoǵamynyń basqarma tóraǵasy A.Esimovtiń aqparatyn tyńdaı kele, Nursultan Nazarbaev bıznes belsendiliktiń kúrt tómendeýi jaǵdaıynda kvazımemlekettik sektordyń memlekettik tapsyrystary men satyp alýlary óndiristik kásiporyndarǵa jáne kásipkerlerge kómek kórsetýdiń tıimdi sharasyna aınalǵanyn atap ótti.
– 2018-2020 jyldar aralyǵynda Qordyń satyp alýynyń 93 paıyzy, ıaǵnı jalpy sommasy bir trıllıon teńgeden asatyn 4200 pozıtsııa básekelestik ortaǵa berildi. 23 myńǵa jýyq kásipkerlik sýbektiler satyp alýǵa tikeleı qol jetkizdi. Osy kezeńde bir kózden satyp alý 60 paıyzǵa azaıǵan. Nátıjesinde 400 mıllıard teńgeden astam qarjy únemdeldi. Osy jumysty jalǵastyrý kerek, – dedi Qordy basqarý jónindegi keńestiń Tóraǵasy.
Keńes barysynda «QazMunaıGaz» ulttyq kompanııasy» aktsıonerlik qoǵamy, «Qazaqstan temir joly» ulttyq kompanııasy» aktsıonerlik qoǵamy, «Qazatomónerkásip» ulttyq atom kompanııasy» aktsıonerlik qoǵamy, «Qazaqtelekom» aktsıonerlik qoǵamy, «Samuryq-Energo» aktsıonerlik qoǵamy jáne «Eır Astana» aktsıonerlik qoǵamy basshylarynyń esepteri tyńdaldy.
Sondaı-aq, Qazaqstannyń Tuńǵysh Prezıdenti kásiporyndardyń toqtap qalýyna jáne qysqartýlarǵa jol bermeı, oń qarqyn saqtap qalýǵa múmkindik ashqan Qordyń jańa damý strategııasynyń tıimdiligin atap ótti.
– Strategııalyq mańyzdy salalarda barlyq kásiporynnyń áleýmettik turaqtylyǵyn saqtaý, jumysshylarǵa qamqorlyq tanytý jáne turaqty qyzmetin qamtamasyz etý qajet. Óndiristik personaldy barynsha qorǵaýymyz kerek. Bul 300 myń adam jáne 340-tan astam kásiporyndy qamtıdy. Importqa táýeldilikti azaıtý úshin de biraz sharýa atqaryldy. Qordyń úlgisinde otandyq bızneske belsendi qoldaý kórsetýdi úırendik, – dedi Elbasy.
Nursultan Nazarbaev usynylǵan ózgerister táýelsiz qorlardy damytýdyń álemdik tájirıbesine sáıkes keletinin atap ótti.
Qazaqstannyń Tuńǵysh Prezıdenti Qordyń damý strategııasyn iske asyrý boıynsha «Samuryq-Qazyna» basshylyǵynyń qyzmetine oń baǵa berdi.
Otyrys qorytyndysy boıynsha Keńes músheleri Qordy ınvestıtsııalyq holdıngke aınaldyrýdyń tujyrymdamasyn maquldady. Sondaı-aq «Samuryq-Qazyna» aktsıonerlik qoǵamy basqarmasyna pandemııa kezinde otandyq taýar óndirýshilerdi qoldaýǵa baǵyttalǵan is-sharalardy júzege asyrýdy jalǵastyrýdy tapsyrdy.
