Elbasynyń tóraǵalyǵymen Qazaqstan halqy Assambleıasynyń XXIX sessııasy ótti
Sessııada sóılegen sózinde Nursultan Nazarbaev 30 jyl buryn kópultty ári kópkonfessııaly Qazaqstan halqy mańyzdy tańdaý jasap, bolashaqqa birlikpen, tatýlyq jáne kelisimmen bet burǵanyn atap ótti.
– Bul bizge memlekettiligimizdi qurýǵa qolaıly jaǵdaı jasap, Qazaqstannyń qazirgi kelbetin qalyptastyrýǵa qajetti mol resýrspen qamtamasyz etti. «Biz, ortaq tarıhı taǵdyr biriktirgen Qazaqstan halqy» dep bastalatyn elimizdiń Konstıtýtsııasy oǵan negiz boldy, – dedi Qazaqstannyń Tuńǵysh Prezıdenti.
Nursultan Nazarbaev elimizdiń áleýmettik-ekonomıkalyq damýy men halyqtyń turmysyn jaqsartýdaǵy jetistikterin aıtty.
– Qazirgi naryqtyq ekonomıkany jańadan qurdyq, irgeli reformalar tabysty júzege asty. Sonyń arqasynda Qazaqstan álemdegi damyǵan 50 memlekettiń jáne tabys deńgeıi ortashadan joǵary elderdiń qataryna qosyldy. Elimiz jahandyq ulttar qoǵamdastyǵynyń bedeldi ári senimdi múshesine aınaldy – kók týymyz Birikken Ulttar Uıymynyń shtab-páterinde jelbirep tur. Biz halyqaralyq arenada ózimizdiń ulttyq múddelerimiz ben basymdyqtarymyzdy júıeli túrde qorǵap kelemiz. Qazaqstannyń memlekettik shekarasy zań júzinde bekitilip, ony álemniń barlyq elderi moıyndady, – dedi Qazaqstannyń Tuńǵysh Prezıdenti.
Elbasy Qazaqstannyń ıadrolyq qarýsyzdaný jáne ony taratpaý salasyndaǵy kóshbasshylyǵy álemdik qoǵamdastyqqa adamgershiliktiń jańa standartyn ákelgenin atap ótti. Sonymen qatar elimiz bastamashy bolǵan Eýrazııa ekonomıkalyq odaǵy, Azııadaǵy ózara yqpaldastyq jáne senim sharalary keńesi, Túrki keńesi, Álemdik jáne dástúrli dinder lıderleriniń sezi sııaqty ıntegratsııalyq jobalarǵa erekshe nazar aýdaryldy.
– Kópvektorly saıasattyń arqasynda biz yntymaqtastyq pen tatýlyqty qamtamasyz etýge bet burǵan beıbitsúıgish ult retinde tanyldyq. Táýelsizdik Qazaqstan úshin ádildik ornaǵan aıtýly kezeńge aınaldy. Óz taǵdyryn óz qolyna alǵan qazaq halqy ulttyq rýhy men tól tarıhyn qaıta túletti. Biz Uly dala mádenı murasynyń baǵa jetpes qazynasyn jandandyryp, álem jurtshylyǵyna usyndyq. Ol barsha adamzat ıgiliginiń ajyramas bóligine aınaldy. Munyń bári tarıhı máni zor oqıǵa ekeni anyq. Eki jyldan astam ýaqyt ishinde boı kótergen Túrkistan qalasy elimizdiń zor múmkindikteriniń taǵy bir aıǵaǵy boldy, – dedi Nursultan Nazarbaev.
Qazaqstannyń Tuńǵysh Prezıdenti búginde Qazaqstan jaýapty jańa kezeńge aıaq basqanyn atap ótti. Bul pandemııa men jahandyq ekonomıkadaǵy daǵdarys qubylystary kúsheıgen, sondaı-aq álemdik kóshbasshy elderdiń geosaıası básekeci shıelenisken kezeńmen tuspa-tus kelip otyr.
– Osy jáne basqa da qolaısyz jaǵdaılar memleketimizdiń damýyna teris áserin tıgizbeı qoımaıdy. Bul oraıda el Prezıdenti Qasym-Jomart Toqaev jan-jaqty oılastyrylǵan syndarly saıasat júrgizip jatqanyna senimdimin. Muny bárimiz qoldaýǵa tıispiz. Ol barlyq qazaqstandyqtardyń múddesine jáne ultymyzdy odan ári damytý maqsattaryna qyzmet etedi, – dedi Elbasy.
Nursultan Nazarbaev óz sózinde aldaǵy ýaqytta memlekettik saıasat pen ulttyq tutastyqtyń berik arqaýy bolýǵa tıis bes qaǵıdatqa erekshe nazar aýdardy. Ol: memleket pen halyq arasyndaǵy senimge jáne ózara is-áreketke negizdelgen qazaqstandyq patrıotızm qaǵıdaty; azamattardyń quqyqtarynyń teńdigi qaǵıdaty; memlekettik til – qazaq tiliniń biriktirýshi róli qaǵıdaty; mádenıetter alýandyǵymen sabaqtasatyn «Alýan túrliliktiń birligi» qaǵıdaty; ulttyń úzdiksiz jańǵyrýy qaǵıdaty.
– Assambleıa aldaǵy jumys strategııasyn aıqyndaǵanda osy qaǵıdattardy negizge alýy kerek. Sondaı-aq qoǵamdyq damýdyń pármendi ınstıtýty retinde jańa jaǵdaıǵa oraı uıym qyzmetiniń tıimdiligin arttyrý sharalaryn qabyldaý qajet. Assambleıa ınstıtýttary elimizdegi etnosaralyq kelisimge nuqsan keltirýi yqtımal kez kelgen syn-qaterge toıtarys berýge árdaıym ázir bolýǵa tıis, – dedi Qazaqstannyń Tuńǵysh Prezıdenti.
Elbasy sondaı-aq barlyq etnoáleýmettik toptardyń birtutas Qazaqstan qoǵamy bolyp júıeli birigýin jalǵastyrý qajettigine toqtaldy.
– Osy jyldar ishinde men árdaıym halyqtyń tatýlyǵyn, baqýat ári úılesimdi ómirin, elimizdiń qaýipsizdigin, turaqtylyq pen tynyshtyqty basty orynǵa qoıdym. Soǵys, dinı jáne etnosaralyq qaqtyǵystar halqymyzdyń tynysh ómirine qaýip tóndirmeýin, bizdiń baıtaq Otanymyz beıbitshiliktiń qutty mekeni bolǵanyn qaladym. Búginde sol armanym oryndaldy. Oǵan 1995 jyly meniń bastamammen qurylǵan Qazaqstan halqy Assambleıasynyń da qosqan úlesi qomaqty, – dedi Nursultan Nazarbaev.
Qazaqstannyń Tuńǵysh Prezıdenti halqymyzdyń baqýat ómir súrip, eńbek etip, bolashaǵyn quryp jatqany tatýlyq pen kelisimniń arqasy ekenin atap ótti.
– Eń bastysy – jetken jetistikterimizdi kózdiń qarashyǵyndaı qorǵaı bilýimiz kerek. Barshamyz búkil qoǵamnyń múddesi jolynda jumyla bilsek qana elimizdegi turaqtylyq pen birlikti saqtap qalamyz. Biz Qazaqstan qoǵamynyń syrtqy kúshterdiń áserinen shaıqalýyna jol bermeýimiz kerek, – dedi Elbasy.
Sońynda Nursultan Nazarbaev Assambleıanyń barsha múshelerine uıymnyń eldi damytý baǵytyna udaıy qoldaý kórsetkeni úshin alǵys aıtty.
– «Qazaqstan Respýblıkasynyń Tuńǵysh Prezıdenti – Elbasy týraly» konstıtýtsııalyq zańǵa jáne «Qazaqstan halqy Assambleıasy týraly» Zańǵa sáıkes meniń Qazaqstan halqy Assambleıasyn ómir boıy basqarýǵa quqyǵym bar ekenin bilesizder. Bul rette Assambleıany basqarýdyń birqatar ókilettikteri el Prezıdentiniń quzyrynda. Qazaqstan halqy Assambleıasy Memleket basshysynyń mańyna toptasyp, oǵan tirek bolýy kerek. Sondyqtan men Qazaqstan halqy Assambleıasyn basqarý quqyǵyn Prezıdent Qasym-Jomart Kemeluly Toqaevqa berýdi uıǵardym. Bul sheshim Assambleıanyń múddesine saı kelip, Qasym-Jomart Kemeluly Toqaevqa barlyq jumysty, sondaı-aq halqymyzdyń, qoǵamymyz ben memleketimizdiń bolashaǵyna qatysty barlyq josparlardy júıeli qurýǵa kómektesedi dep kámil senemin, – dedi Qazaqstannyń Tuńǵysh Prezıdenti.
Óz kezeginde Qazaqstan Prezıdenti Qasym-Jomart Toqaev Nursultan Nazarbaevqa «Qazaqstan halqy Assambleıasynyń Qurmetti Tóraǵasy» mártebesin berýdi usyndy.
– Qurmetti Nursultan Ábishuly, Assambleıanyń Qurmetti Tóraǵasy bolý jónindegi bizdiń ortaq usynysymyzdy qabyl alýyńyzdy suraımyz. Bul mártebe halqymyz ben memleketimizdiń aldyndaǵy tarıhı eńbegińiz úshin Sizge laıyq. Assambleıanyń barlyq músheleri bul usynysty qoldaıtynyna senimdimin, – dedi Memleket basshysy.
