Elbasynyń tarıhı maqalasy ǵasyr suraqtaryna júıeli jaýap beredi
ASTANA. QazAqparat - Búgin Astana qalasy ákiminiń orynbasary Ermek Amanshaevtyń tóraǵalyǵymen «Rýhanı jańǵyrý» baǵdarlamasyn júzege asyrý máseleleri jónindegi sarapshylar tobynyń otyrysy ótti, dep habarlaıdy QazAqparat.
«Búgin biz óte mańyzdy máseleni talqylamaqpyz. Elbasymyz Nursultan Nazarbaevtyń «Bolashaqqa baǵdar: rýhanı jańǵyrý» atty maqalasy qalyń jurtshylyqtyń erekshe yqylasyna bólenip, qazaqstandyqtardyń keń qoldaýyn tabýda. Fýtýrolgtar sońǵy ýaqytta ǵylym men bilimniń qaryshtap damyp, jańa sapaǵa kóshýin, kommýnıkatsııalardyń jetilýin, jahandyq syn-qaterler, onyń ishinde transshekaralyq terrorızm, azyq-túlik qaýipsizdigi, mıgratsııalyq tolqyndar, álemdegi geosaıası teketirester, ǵalamdyq jylyný, órkenıetter arasyndaǵy taıtalas, úshinshi ındýstrııalyq jańǵyrýdyń jańa sıpatta óris alýyn jıi aıtýda. Bir jaǵynan - damýdyń joǵary deńgeıindegi elderdegi iri geoekonomıkalyq, geosaıası qubylystar men monopolııalar, ekinshi jaǵynan - álem kartasynan óz ornyn, jónin anyqtap, laıyqty mártebe alýǵa umtylǵan damýshy memleketter. Jahandaǵy báseke, naryqqa qabilettilik, alǵa ozǵan tehnologııalar, aqparattar tasqyny, jahandaný úrdisteri, zamana talaptary men talqysy, mine, osy sekildi kúntártibinde turǵan ózekti, kókeıkesti máselelerge qanshalyqty mán berilýde? Ol úshin memleket ult bolyp qandaı basymdyqtar, bastamalardy qolǵa alýy kerek?», - dedi ol otyrysty asha kele.
Osy rette Amanshaev Elbasynyń tarıhı maqalasy osyndaı ǵasyr suraqtaryna júıeli jaýap berip, Máńgilik el bolýǵa murattalǵan Qazaqstannyń rýhanı salada aldaǵy damýynyń negizi baǵyttaryn taıǵa tańba basqandaı anyq, tereń aıqyndap bergenin basa aıtty.
«Endigi bizdiń maqsatymyz - Ult kóshbasshysy aıqyndap bergen osy kontseptýaldy ustanymdardy, keshendi baǵdarlamany qoǵam bolyp jumylyp, tolyq, mazmundy, kreatıvti túrde júzege asyrý. Búginde el kóleminde qyrýar jumys atqarylyp jatyr. Búkil memlekettik jáne azamattyq qoǵam ınstıtýttary atalǵan baǵytta jumylyp eńbek etýde», - dedi elorda ákiminiń orynbasary.
