Elbasynyń tapsyrmasyna sáıkes BQO-daǵy sý tasqynynan zardap shekkenderge kómek ýaqtyly kórsetildi – Q.Bısembaev
Osy jasalǵan jumystar jóninde BQO tótenshe jaǵdaılar departamentiniń bastyǵy Qadyr Bısembaev bylaısha áńgimelep berdi.
-Sý tasqyny bastalǵanǵa deıin óńirde oǵan daıyndyq jumystary keshendi júrgizildi, - dedi Qadyr Ýapuly. Soǵan qaramastan, apat aıtyp kelmeıdi, 8 sáýirde buryn-sońdy bolmaǵan sý tasqyny bastaldy. Oǵan Derkól men Shaǵan ózeni boıynda qys boıy jınalǵan qardyń kóptigi, eki kúnge sozylǵan jańbyr, topyraqtyń qatyp qalyp, sýdyń sińbeýi qatty áser etti. Ásirese, Shaǵan ózeninde sýdyń kóterilý bıiktigi 1444 santımetrge jetip, Oral qalasy jáne oblystyń Aqjaıyq, Zelenov, Tasqala, Terekti jáne Shyńǵyrlaý aýdandarynyń biraz aýmaǵyn sý astynda qaldyrdy. 1542 turǵyn úı, 7146 saıajaı baspanasy sýǵa ketti. Oblys ortalyǵy men aýdandarda 9 densaýlyq, 15 bilim, 5 mádenıet, 8 energetıka nysany tilsiz jaýdyń qursaýyna ilikti. 100 jol bóligin sý shaıyp ketti. Barlyǵy 8905 adam qaýipsiz jerge kóshirildi.
Tótenshe jaǵdaıdyń zardaptaryn joıý baǵytynda arnaıy shtab qurylyp, kóptegen jumystar jedel atqaryldy. Sý tasqyny bolǵan jerlerge QR TJM jedel toby, sondaı-aq Ońtústik Qazaqstan, Qyzylorda, Atyraý, Qostanaı, Aqtóbe oblystarynan áriptester kelip, qutqarý jumystaryna jergilikti oryndarmen birige otyryp, bilek sybana kiristi. Qazaqstan Úkimetiniń 2011 jylǵy 16 sáýirdegi qaýlysyna sáıkes memlekettik rezervten 67 tonnadan astam azyq-túlik, kúndelikti tutynatyn buıymdar, 75 tonna dızeldi otyn, 10 motopompa, barlyǵy 39,5 mln. teńgege jýyq qarjynyń zaty sý tasqyny bolǵan aýdandarǵa shuǵyl jetkizildi.
Sol kezeńde 615 adam qutqarylsa, kóshirilgen 8905 adamnyń 157-si bala edi. Olarǵa tamaq pen medıtsınalyq kómek uıymdastyryldy.
Qutqarý jumystaryna QR TJM jeke quramynan 283 qyzmetker, 98 tehnıka, 2 tikushaq, 2 ushaq, 42 júzý quraly, jergilikti atqarýshy organdar men qyzmetterden 2200 adam, 310 tehnıka jumyldyryldy. Bul mal shyǵynyn edáýir qysqartýǵa múmkindik berdi. Barlyǵy 437 qoı, 63 shoshqa, 87 iri qara shetinedi. Ólgen mal jerlenip, kúnbe-kún maldárigerlik baqylaý ornatyldy.
Eń basty atap aıtar jaıt, Elbasynyń tapsyrýy boıynsha oqıǵa bolǵan sátten bastap tosyn jaǵdaıǵa dýshar bolǵan halyqqa barlyq kómek kórsetildi. Bul jaǵdaı Memleket basshysynyń udaıy nazarynda boldy.
Alǵashqy kúnderi-aq QR Úkimetiniń 13 sáýirdegi qaýlysymen sý tasqynynyń zardaptaryn joıý úshin 870 mln. teńge bólindi. Keıin 11 mamyrdaǵy qaýlymen rezervten 6 mlrd. 680 mln. teńge taǵy berildi. Qazaqstan oblystary, Astana jáne Almaty qalalary ákimdikteri 1,5 mlrd. teńge kóleminde qoldaý kórsetti. Bilim jáne ǵylym, densaýlyq saqtaý, kólik jáne kommýnıkatsııalar mınıstrlikteri 3 mlrd. astam teńge bólse, «QazMunaıGaz», «Qazaqstan temir joly» ulttyq kompanııalary 5 mlrd. teńge aýdardy. Elimizdiń barlyq óńiri tek qarjylaı ǵana emes, gýmanıtarlyq járdemin de aıaǵan joq. Oral qalasy, Zelenov, Tasqala aýdandaryndaǵy jańa qurylys pen jóndeý-qalpyna keltirý jumystaryna 17 mlrd. 55 mln. teńge bólindi.
Bıýdjettik jáne demeýshilik qarjy esebinen 6 mlrd. 811 mln. teńgege Oralda bir 240 jáne úsh 90 páterlik úı, Tasqalada 72 páterlik 40 úı, Zelenovta 106 páterlik 56 úı boı kóterdi. Jańa turǵyn úılerge ınfraqurylymdyq júıe qosa júrgizildi.
Turǵyn úıler men kommýnaldyq menshik nysandaryn jóndeý-qalpyna keltirý jumystaryna 873,0 mln. teńge qarastyrylsa, 544,0 mln. teńge zardap shekkenderdiń jeke esepshotyna aýdaryldy.
Oblystyq jáne aýdandyq mańyzy bar joldar jáne Oral qalasynyń ishindegi joldar da jóndelý ústinde, buǵan 3 mlrd. 906 mln. teńge qarastyryldy.
Energetıka nysandaryn retke keltirý de nazardan tys qalmaı, 870 mln. teńge baǵyttaldy.
Bilim, densaýlyq saqtaý, áleýmettik qorǵaý, mádenıet nysandaryn jóndeýge jáne shybyn-shirkeımen kúres sharalaryna 2 mlrd. 715 mln. teńge jumsalýda.
Ózender jaǵalaýyn bekitýge (damba salý, arna tazartý jáne tereńdetý) 1 mlrd. 592,9 mln. teńge berildi. Quny 245 mln. teńge turatyn sýdan qutqarý stansasynyń qurylysy da júrgizilýde.
«Bul jumystardyń bári de kestege sáıkes júrgizilýde jáne udaıy baqylaýda», - dep qorytty oıyn Q.Bısembaev.
