Elbasynyń tapsyrmasymen qurylyp jatqan Astana jańa ýnıversıtetiniń quramynda 7 mektep bolady - J.Túımebaev
ASTANA. Jeltoqsannyń 4-i. QazAqparat /Gúlmıra Álıakparova/ - Elbasynyń tapsyrmasy boıynsha qurylyp jatqan Astana ýnıversıtetiniń quramyna ártúrli baǵytta bilim beretin 7 mektep kiredi. Bul týraly búgin QR Bilim jáne ǵylym mınıstrliginiń alqa májilisinde mınıstr Janseıit Túımebaev aıtty,
dep habarlaıdy QazAqparat.
Vedomstvo basshysy: «Elbasynyń tapsyrmasy boıynsha qurylyp jatqan jańa ýnıversıtet - joǵary bilim berýdegi negizgi serpindi joba bolyp tabylatynyn», - atap ótip, Bilim mınıstrligi Dúnıejúzilik Bankpen birlese otyryp, Dýbaıdaǵy, Katardaǵy, Sıngapýrdegi, Qytaı men Saýd Arabııasyndaǵy balama jobalardyń tájirıbelerin jiti zerdelegenin jetkizdi.
Sondaı-aq, Londonnyń ýnıversıtettik kolledjimen Astana jańa ýnıversıtetinde daıyndyq mektebin ashý boıynsha kelisimge qol qoıylyp, Pıtsbýrg jáne Nıý-Djersı Tehnologııalyq ýnıversıtetterimen, Kent Memlekettik ýnıversıtetimen memorandýmdar jasaldy. Sonymen birge, ústimizdegi jylǵy maýsymnyń 20-synda «Astana jańa ýnıversıteti» kommertsııalyq emes aktsıonerlik qoǵamy qurylyp, dırektorlar keńesi jasaqtaldy. Onyń tóraǵasy QR Úkimetiniń basshysy Kárim Másimov bolyp tabylady.
Astana jańa ýnıversıtetiniń quramyna 7 mektep kirmek. Aǵylshyn tili men beıindik pánderdi oqytýǵa arnalǵan bir jyldyq daıarlyq mektep (stýdentter IELTS, TOEFL jáne basqa da halyqaralyq standartty sertıfıkattardy alyp shyǵady). Bul mektepke 2010 jyly 700 adam qabyldaý josparlanýda.
Ekinshisinde - Jalpy bilim departamenti ornalastyrylady. Munda jalpy bilim berý pánderi boıynsha bakalavrıattyń 1-kýrs stýdentteri daıarlanady. Al medıtsınalyq mektepte stýdentter klınıkalyq jáne ǵylymı baǵyttar boıynsha bilim alatyn bolady.
Injenerlik mektepte basymdyqty baǵyttar boıynsha ınjenerler oqytylsa, jaratylystaný ǵylymdary mektebi fızıka, hımııa, bıologııa, matematıka jáne basqa da salalarda zertteýshi-mamandardy daıyndap shyqpaq.
Bıznes mektebine magıstrler men PhD doktorlaryn daıarlaýmen qatar, jekemenshik jáne memlekettik sektordyń top-menedjerlerine arnalǵan oqytý baǵdarlamalary engizilse, memlekettik saıasat mektebi memleket jáne jekemenshik sektor úshin basqarýshylardy oqytatyn bolady.
