Elbasynyń «Shen úshin emes, el úshin qyzmet et!» degen sózi esimde qaldy – ofıtser
Bul týraly QR Ulttyq ulany «Batys» óńirlik qolbasshylyǵynyń ofıtseri, podpolkovnık Salaýat Qabdyqulov málim etti, dep habarlaıdy QazAqparat tilshisi.
Ómir bolǵan soń, túrli kóldeneń oqıǵalar bolyp jatady. Mine, osyndaı kezde Ulttyq ulan jaýyngerleri de árqashan adamdarǵa kómek kelýge daıyn. Muny olar is júzinde kórsetip keledi. Solardyń biri – Salaýat Qabdyqulov.
Budan alty jyl buryn, 2014 jyly 14 mamyr kúni Salaýat Álimjanuly túski úzilis sátinde Oraldaǵy Qurmanǵazy kóshesimen kele jatyp, kóp qabatty úılerdiń biriniń besinshi qabatyndaǵy páterdiń terezesinen laýlap janyp jatqan órtti kóredi. Sol úı turǵyndarynan janyp jatqan páterde qojaıynnyń qalǵanyn bildi. Óz ómirine qaýip tóngenine qaramastan, páterge qoıyp ketip, qart adamdy órt ishinen alyp shyqty.
Osy erligi úshin ol «Jaýyngerlik erligi úshin» medalimen marapattaldy. Bul marapatty 2015 jyly Otan qorǵaýshylar kúnine oraı Elbasy N.Á.Nazarbaev basqa da áskerı qyzmetshilermen birge «Batys» óńirlik qolbasshylyǵyna qarasty 5546-áskerı bólimi áskerı polıtsııa bólimshesiniń bastyǵy, podpolkovnık Salaýat Qabdyqulovqa tabys etti.
«Elbasy qolynan marapat alý – qurmet ári senim, sonymen qatar úlken jaýapkershilik júkteıdi. Sol marapattaý kezinde Ult kóshbasshysynyń «Shen úshin emes, el úshin qyzmet jasa» degen sózi erekshe áser etti», deıdi búginde S.Qabdyqulov.
«Batys» óńirlik qolbasshylyǵy baspasóz qyzmetiniń bastyǵy, podpolkovnık Erbolat Sultanovtyń málim etkenindeı, Salaýat Qabdyqulov 1977 jyly 1 qyrkúıekte Oral qalasynda zaýyt jumysshylarynyń otbasynda dúnıege kelgen. Anasy Raýza Samıǵollaqyzy keńes dáýirinde tanymal bolǵan «Metallıst» zaýytynda baqylaýshy, ákesi Álimjan Yntaǵalıuly slesar-qurastyrýshy bolyp eńbek etken.
Orta mektepten keıin polıtehnıkalyq tehnıkýmdy támamdaǵan Salaýat QR ІІM akademııasynda jol qozǵalysyn uıymdastyrý ınjeneri, keıin Qaraǵandy zań ınstıtýtynda zańger-quqyqtanýshy mamandyǵyn alady. Aldymen jol polıtsııasy bóliminde ákimshilik tájirıbe ınspektory, 2007-2009 jyldary BQO ishki ister basqarmasy jol polıtsııasy batalonynda aǵa ınspektor qyzmetin atqardy. Al 2009 jylǵy 3 qyrkúıekten bastap 5546-áskerı bóliminiń áskerı polıtsııa bólimshesinde qyzmet etip keledi.
