Elbasynyń servıstik sektordy damytý jónindegi tapsyrmasy qalaı oryndalyp jatyr

ALMATY. QazAqparat - QR Parlamenti Májilis depýtaty Zaǵıpa Balıeva Almaty qalasy ákimdiginiń Open Almaty qoǵamdyq qabyldaýynyń jumysymen de tanysty, dep habarlaıdy QazAqparat tilshisi.

Halyq qalaýlysy Almatyǵa Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» taqyrybyndaǵy Joldaýyn túsindirý maqsatymen kelgen. 

Onyń aıtýynsha, mundaı ınnovatsııalyq ortalyq bıylǵy Joldaýdyń jekelegen tustarymen ushtasyp jatyr.

«Qazir biz Úshinshi jańǵyrý jolyndamyz. Sizderdiń osyndaı ınnovatsııalyq ortalyq ashyp, front-ofıs, bek-ofıster arqyly halyqpen tyǵyz baılanys ornatqandaryńyz Úshinshi jańǵyrýdyń bir bóligindegi mindettermen ushtasyp otyr», - dedi Májilis depýtaty.

Joldaýda ınnovatsııalyq jáne servıstik sektorlardy damytýǵa erekshe kóńil bólý, «bolashaq ekonomıkasynyń» balamaly energetıka, jańa materıaldar, bıomedıtsına, úlken derekter, zattar ınterneti, jasandy ıntellekt, blokcheın jáne basqa da baǵyttaryn ilgeriletýdi qamtamasyz etý qajettigi aıtylǵan bolatyn.

Zaǵıpa Balıeva osy sharalardy iske asyrýda Open Almaty-nyń mańyzy zor ekenin aıtty.

«Open Almaty da ınnovatsııalyq jáne servıstik sektorǵa jatady. Sizder Joldaýdyń barlyq baǵytynda aıtylǵan mindetti oryndap jatqandaryńyzdy bilgenderińiz durys. Sizder  «bolashaq ekonomıkasyn» jasaýǵa qatysasyzdar. Adamdardyń ýaqytyn únemdep, betpe-bet túsindirme jumystaryn júrgizesizder. Bul ortalyqqa óte kóp nárse baılanysty», - dedi ol.

Májilis depýtaty Zaǵıpa Balıevanyń paıymdaýynsha, qoǵamdyq qabyldaý Joldaýda kórsetilgen memlekettik organdar qyzmetiniń tıimdiligin túbegeıli arttyrýǵa, sonymen qatar jemqorlyqty azaıtýǵa septigin tıgizedi.

«Bul sizderge tikeleı qatysty. Memleket pen qoǵam arasyndaǵy alshaqtyqty qysqarttyńyzdar. Qanshalyqty tıimdi ekenin ýaqyt kórsetedi. Biraq qazirgi talpynystyń ózi jaman emes. Al jemqorlyqpen kúres aıasyndaǵy sharalardyń biri - memlekettik qyzmetshilerdiń turǵyndarmen tikeleı qarym-qatynasyn azaıtý Open Almaty jáne «bir tereze» qaǵıdaty boıynsha jumys jasaıtyn ortalyqtar arqyly iske asady. Halyqpen jumys isteýdiń jańa zamanaýı formattaryn engizý tapsyrylǵan polıtsııa, bul turǵyda Open Almaty-dan úlgi ala alady», - dedi halyq qalaýlysy.

Aıta ketý kerek, QR Parlament depýtattary óńirlerdi aralap QR Prezıdentiniń Joldaýyn túsindirý jumystaryn bastap ketti.

17 qazanda  Senat depýtattary Dınar Núketaeva, Tóleýbek Muqashev, Baqytjan Jumaǵulov Qyzdar memlekettik pedagogıkalyq ýnıversıtetiniń ujymymen kezdesken edi.

Keshe, ıaǵnı 18qazanda Senat depýtattary qalalyq ІІD ujymymen kezdesip, ishki ister organdaryn reformalaýdyń negizgi baǵyttaryn aıqyndaǵan bolatyn.