Elbasynyń Parlamentaralyq odaqtyń tóraǵasymen kezdesýinde yntymaqtastyqty tereńdetýdiń perspektıvalary qaraldy
ASTANA. QazAqparat - Nursultan Nazarbaev Parlamentaralyq odaqtyń tóraǵasy Saber Choýdhýrımen kezdesti, dep habarlaıdy Aqordanyń baspasóz qyzmeti.
Kezdesý barysynda parlamentaralyq ózara is-qımyldy nyǵaıtýdyń, uıymmen yntymaqtastyqty odan ári tereńdetýdiń perspektıvalary qaraldy. Taraptar sondaı-aq, halyqaralyq kún tártibindegi ózekti máselelerdi talqylady.
Memleket basshysy halyqaralyq antııadrolyq konferentsııaǵa qatysý úshin elimizge saparmen kelgeni úshin S.Choýdhýrıge alǵys aıtty.
Nursultan Nazarbaev túrli elderdiń parlament músheleri arasyndaǵy tyǵyz baılanystyń, halyqaralyq qaýipsizdikti nyǵaıtý jáne ıadrolyq qarýdan azat álem qalyptastyrý úshin birlese qyzmet etý jolynda jumylýdyń mańyzdylyǵyn atap ótti.
S.Choýdhýrı qonaqjaılyq úshin alǵys aıtyp, elimizben strategııalyq jáne dostyq qarym-qatynasty odan ári damytý úshin barlyq kúsh-jigerin jumsaýǵa daıyn ekenin jetkizdi.
