Elbasynyń otbasyn ómir boıy el salyǵyna asyraý máselesi referendýmǵa shyǵarylady - feık

NUR-SULTAN. QazAqparat - Telegram-chattarda 5 maýsymda ótetin referendýmda Nursultan Nazarbaevtyń otbasy múshelerine qol suǵylmaıtynyna kepildik beretin jáne ómir boıy halyqtyń salyǵy esebinen asyraýǵa múmkindik beretin túzetýler qabyldanatyny jaıly aqparat tarady. Bul jalǵan, dep habarlaıdy QazAqparat Stopfake.kz resýrsyna silteme jasap.

QR Ádilet mınıstrligi bul málimetti joqqa shyǵardy.

Vedomstvonyń habarlaýynsha, Tuńǵysh Prezıdent mártebesine qatysty Konstıtýtsııaǵa engiziletin túzetýlerge sáıkes úsh norma ózgeredi.

Birinshi. 42-baptyń 5-tarmaǵynyń ekinshi bóligi alyp tastalady, oǵan sáıkes bir adam qatarynan eki retten artyq Respýblıka Prezıdenti bolyp saılana almaıdy. Bul shekteý Qazaqstan Respýblıkasynyń Tuńǵysh Prezıdentine qoldanylmaıdy.

Ekinshi. 46-baptyń 4-tarmaǵy alyp tastalady. Onda Tuńǵysh Prezıdenttiń mártebesi men ókilettikteri Respýblıka Konstıtýtsııasymen jáne konstıtýtsııalyq zańmen aıqyndalatyny jazylǵan.

Qazirgi ýaqytta Tuńǵysh Prezıdenttiń quqyqtyq mártebesi «Qazaqstan Respýblıkasynyń Tuńǵysh Prezıdenti – Elbasy týraly» jeke Konstıtýtsııalyq zańmen retteledi.

Tuńǵysh Prezıdentke jáne onymen birge turatyn otbasy múshelerine jeke menshik quqyǵymen tıesili múlikke qol suǵylmaýshylyq atalǵan Konstıtýtsııalyq zańda belgilengen.

Óz kezeginde, atalǵan norma Konstıtýtsııadan alyp tastalǵan jaǵdaıda, Qazaqstan Respýblıkasynyń zańnamasyn Konstıtýtsııa normalaryna sáıkes keltirý úshin osy zańdy joıý qajet bolady.

Úshinshi. Tuńǵysh Prezıdenttiń atalýy Konstıtýtsııanyń 91-babynyń 2-tarmaǵynan alyp tastalady.

Konstıtýtsııanyń 91-babynyń 2-tarmaǵyna sáıkes Konstıtýtsııada belgilengen memlekettiń táýelsizdigi, Respýblıkanyń birtutastyǵy men aýmaqtyq tutastyǵy, ony basqarý nysany, sondaı-aq táýelsiz Qazaqstannyń Negizin salýshy, Qazaqstan Respýblıkasynyń Tuńǵysh Prezıdenti – Elbasy irgesin qalaǵan Respýblıka qyzmetiniń túbegeıli prıntsıpteri jáne Qazaqstan Respýblıkasynyń Tuńǵysh Prezıdenti – Elbasynyń mártebesi ózgermeıdi.
Tuńǵysh Prezıdent mártebesine qatysty atalǵan erejelerdi alyp tastaý usynyldy

Joǵaryda aıtylǵandardy qorytyndylaı kele, Konstıtýtsııaǵa engiziletin túzetýler jobasy Qazaqstan Respýblıkasynyń Tuńǵysh Prezıdentine jáne onyń otbasyna jańa kepildikter berýdi kózdemeıdi.

Kerisinshe, Konstıtýtsııaǵa ózgerister engizý týraly zań jobasynda Tuńǵysh Prezıdent mártebesine qatysty barlyq normalardy alyp tastaý usynyldy.

Demek, Nursultan Nazarbaevtyń búkil otbasy múshelerin salyq esebinen ustaýǵa kepildik beretin túzetýler referendýmǵa shyǵarylatyny týraly aqparat – feık.