Elbasynyń óńir ákimderine bergen tapsyrmasy oryndalmaı otyr - Saǵyntaev
ASTANA. QazAqparat - Memleket basshysy Nursultan Nazarbaevtyń óńirlerde jumyspen qamtý málimetterin bılbordtarda ornatý jónindegi tapsyrmasyn oblys ákimderi oryndamaı otyr. Bul týraly búgin Úkimet otyrysynda QR Premer-Mınıstri Baqytjan Saǵyntaev málim etti, dep habarlaıdy QazAqparat.
"Qazirgi baıandamalarda aıtylǵanyndaı, negizgi bizdiń mindet, ákimderdiń basym mindeti - azamattardyń jappaı jumystan bosap qalýyna, eńbek daýlarynyń týyndaýyna jol bermeý jáne de jumystan bosap qalǵan azamattardy jumyspen qamtý. Esterińizde bolsa, Memleket basshysy óńirlerdegi qalalarda qansha jumys orny qurylǵany, qansha bos jumys oryndary bar, qanshasy jumyspen qamtylǵany týraly aqparatty kórsetip turatyn bılbordtardy ornatýdy tapsyrǵan bolatyn. Aımaqtarǵa baryp júrmin, ondaıdy eshqaı jerden kórmedim. Qatelespesem, Taldyqorǵanda áýejaıdan shyǵa bergende bir bılbord tur sondaı. Bul ádeıi qala qonaqtaryna istelgen shyǵar. Qalada óz azamattary qansha jumys orny qurylǵany, qansha bos jumys oryndary baryn kórsetý úshin eshteńe jasalmaǵan. Demek, Elbasynyń tapsyrmasy óńirlerde oryndalmaı otyr degen sóz. Qurmetti ákimder, osyǵan kóńil bólýdi suraımyn", - dedi B. Saǵyntaev oblys ákimderine qaratyp aıtqan sózinde.
Úkimet basshysy jumysshylardy bosatýdy josparlap júrgen kásiporyndarmen tyǵyz baılanys ornatyp, bul máseleni baqylaýda ustaý qajettigin de eskertti.
"Sonymen qatar jumysshylardyń jumystan bosatylýy týraly jospardy daıyndaý jóninde tapsyrma júktelgen bolatyn. Bul jumysty da tezdetip, jumystan bosap qalý qaýipterin aldyn ala zerttep, anyqtap otyrý qajet. Tamara Qasymqyzy (Dúısenova, QR Eńbek jáne halyqty áleýmettik qorǵaý mınıstri), Sizdiń mınıstrligińiz de osyǵan baqylaý júrgizsin", - dep túıdi oıyn Premer-Mınıstr.
