Elbasynyń «Ómir ótkelderi» kitaby halqymyz úshin paıdaly ári qundy bolady - Saýytbek Abdrahmanov
«Baqyt baǵasyn bilgenniń basynda ǵana turady» degen Nursultan Ábishulynyń tamasha sózi bar. Bul kitap bizdi basymyzdaǵy baqytty baǵalaýǵa úıretedi, soǵan shaqyrady. Kitaptyń basty qundylyǵy da osynda. Atap aıtqanda, jańa ári jaqsy eńbegimen, halyqqa ǵıbrat beretin kitabymen, jas urpaqty ómir súrýge úıretetin kitabymen osy týyndynyń avtory - Elbasy Nursultan Ábishuly Nazarbaevty quttyqtaǵym keledi. Bul kitap arqyly jas urpaq qıyndyqtardy jeńýge bolatyndyǵyn úırenedi. Óziniń boıynan qajyr-qaırat tabylsa, bilim, tabandylyq, adamgershilik tabylsa, ár adam óziniń baqytyn ózi jasaı alatynyn kórsetedi. Sondyqtan da bul kitap bizdiń halqymyzǵa paıdaly ári qundy bolatynyna men óz basym senemin», - dedi S.Abdrahmanov.
Sonymen qatar «Egemen Qazaqstan» gazetiniń prezıdenti bul kitaptyń qalaı jazylǵandyǵy týraly aıtyp berdi. Osy oraıda ol sońǵy jyldarda memleket basqarǵan iri tulǵalardyń barlyǵynyń derlik osyndaı kitaptary jaryq kórgendigin, olardyń birazy jýrnalıstke suhbat túrinde, baıandap berý formasynda shyqqandyǵyn jetkizdi.
«Men kóp oılana kele: «Prezıdent týraly suraq-jaýap túrinde jazsa, emin-erkin aıtýǵa múmkindik beredi eken, bul ózi jaqsy forma eken ǵoı» degen oıǵa keldim. Jalpy, Elbasynyń qajyrly eńbekterin eskere kele, bizdiń elimizde Tuńǵysh Prezıdentimiz týraly qazirgiden áldeqaıda kóp jazylý kerek degendi maqsat tuttym. Sondyqtan da biz Elbasy týraly jazýdy artyq kórmeýimiz kerek. El úshin etken eńbegin aıta berýimiz qajet, ásirese, jastar úshin», - dedi S.Abdrahmanov.
Aıta keteıik, kitapta Prezıdet óziniń shyqqan teginen, balalyq shaǵynan bastap, mekteptegi, jastyq jyldary, Temirtaýdaǵy qurysh quıǵan shaǵy týraly áserli áńgimeleıdi. Sonymen qatar onda Semeı polıgonyn jabý kezeńindegi eńsergen qıyndyqtary, egemendiktiń eleń-alańyndaǵy aldan shyqqan problemalar, shekarany shegendeý kezeńindegi máseleler sııaqty asa kúrdeli de kúrmeýli jaılar suhbat túrinde jan-jaqty qozǵaldy.
