Elbasynyń munaıshylarǵa ázili: Atyraýǵa aıtshylap keldim...

  ATYRAÝ. QazAqparat - Memleket basshysy Nursultan Nazarbaev Atyraý qalasyna jumys sapary aıasynda «Jigermunaıservıs» JShS-niń robot dənekerleýshini paıdalanyp metall qurylymdaryn óndiretin uıymynda boldy, , dep habarlaıdy QazAqparat tilshisi.

«Tabysty bolyńdar, munaıshylar úshin mańyzdy, jaqsy óndiris orny, jaqsy jumys eken», - dedi zaýyttyń tynys-tirshiligimen jan-jaqty tanysqannan keıin jumysshylarmen tildesken Elbasy.

Osy rette kásiporyn jumysshylarynyń biri elimizdiń tynyshtyǵy, halqymyzdyń amandyǵy Prezıdenttiń júrgizip otyrǵan saıasatynyń arqasy ekendigin basa aıtty.

«Sizge kóp-kóp rahmet. Qurban aıt qutty bolsyn, aıttan aıtqa jete bereıik», - dedi ol.

«Qurban aıtqa senderge aıtshylap keldim ǵoı», - dep ázildedi Elbasy.

Kásiporynda dánekerleýshi bolyp jumys isteıtin qaraǵandylyq Ekaterına da Elbasyna jyly lebizin bildirdi.

«Men Sizdiń qaraǵandylyq jerlesińizbin. Tipti men Sizben bir ýnıversıtette bilim alyppyn. Tek Sizdiń zamanyńyzda Qaraǵandy polıtehnıkalyq ınstıtýty bolsa, qazir Qaraǵandy tehnıkalyq ýnıversıteti dep atalady. Sol jerde bilim aldym, magıstratýrada oqyp, ustazdyq ta ettim. Sodan keıin óndiriske aýysyp, Atyraýda bir jyl boldy jumys istep jatyrmyn», - deıdi ol.
 

Óz kezeginde Memleket basshysy dánerkerleýshi mamandyǵynyń óte mańyzdy ekendigin atap ótti. Sonymen qatar Elbasy barlyq óndiris oshaqtarynda tsıfrlandyrý júrgizilip, jumys oryndarynyń ońtaılandyrylyp jatqanyn aıtty.

«Jańa is durys ta. Biraq, ol kóptegen mamandyqtardyń qysqarýymen qatar júredi. Qazir adamǵa ómirinde birneshe mamandyq aýystyrýyna týra keledi. Onsyz bolmaıdy. Kásiporyndaryńyz jańa eken, osy jerde jumys isteý ózderińizge de unaıtyn shyǵar», - dedi Nursultan Nazarbaev.