Elbasynyń «muhıttan - muhıtqa» deıingi aralyqty qamtý usynysy EQYU-nyń geografııalyq jáne mazmundyq quramyn ózgerteri anyq - H.Ábjanov
ASTANA. 10 jeltoqsan. QazAqparat /Gúlmıra Álıakparova/ - Elbasy N.Nazarbaevtyń Astana Sammıtinde EQYU qyzmetinde budan bylaı «muhıttan - muhıtqa» deıingi aralyq ustanymy ornyǵýy kerek degen usynysy, Uıymnyń geografııalyq aýqymyn ulǵaıtyp qana qoımaı, mazmunyn da kúrdeli ózgerteri anyq.
Bul oıyn búgin elordada «Astana Sammıti jáne bolashaq týraly dıalog» taqyrybynda ótken dóńgelek ústelde tarıh ǵylymdarynyń doktory, professor Hangeldi Ábjanov bildirdi.
Professordyń pikirinshe, bıyl Qazaqstan qazaqtyń qandaı halyq ekenin, qolynan ne keletinin, kósilgen jerine saı shalqyǵan talanty bar ekendigin aıdaı álemge pash etti. Al EQYU-ǵa tóraǵalyq etken 11 aıda jetken jetistikteri jáne ol jumystaryn qorytyndylaǵan Astana Sammıti Prezıdent N.Nazarbaev pen onyń komandasynyń, saıasatkerler men elshilerdiń, ǵalymdary men óner sańlaqtarynyń jáne barsha qarapaıym qazaqstandyqtardyń eńbegi dep biledi.
«Birinshiden, - deıdi H.Ábjanov, -Qazaqstan EQYU qyzmetiniń bar salasyn áý basta qabyldanǵan qujattar men mindettemelerge laıyq jolǵa qoıa aldy. Uıymǵa múshe 7 eldegi prezıdenttik, 12 eldegi parlamenttik saılaýlarǵa baqylaý jasaǵandy bylaı qoıǵanda, kórshi Qyrǵyzstandaǵy saıası daǵdarysty eńserýge, ıaǵnı jazyqsyz jandardyń japa shekpeýine qosqan úlesin búginde barsha álem ulyqtap otyr. Ekinshiden, Qazaqstan EQYU taǵdyry Eýropadan tysqaryda, máselen Azııada júrip jatqan úderistermen anyqtalatynyna nazar aýdarta aldy.
Osynaý jańasha oılaý men is-áreket qısyny N.Nazarbaevtyń Astana Sammıtinde sóılegen sózinde naqty kórinis taýyp, Uıym tarıhynyń úshinshi dáýiri bastalǵanyn jarııa etti. Onyń mánisi mynada. 1975 jylǵy Helsınkı Qorytyndy aktisinen 1994 jylǵy Býdapesht Sammıtine deıin Uıym «Atlantıkadan Oralǵa deıingi» aralyqta ustanymymen áreket etse, 1995-shi jyldan beride «Vankýverden Vladıvostokqa» deıingi aralyqta ustanymyn basshylyqqa alyp keldi. Elbasymyzdyń paıymy boıynsha Astana Sammıtinen bastap «muhıttan - muhıtqa» deıingi aralyq ustanymy ornyǵýy kerek. Demek, EQYU qyzmetiniń geografııalyq aýqymynyń ulǵaıýymen qatar, mazmunyn da kúrdeli ózgerter dáýir engeli tur. Al buǵan bastamashy bolǵan el - Qazaqstan ekendigi árbir qazaqstandyqty tebirentedi», - dedi ol.
H.Ábjanovtyń aıtýynsha, úshinshiden, Qazaqstan EQYU-nyń 7-Sammıtinde Uıymǵa qurylymdyq, mazmundyq, ıdeıalyq- ıntellektýaldyq izdenis pen ilgerileý qajet ekenine kóz jetkizdi.
