Elbasynyń quqyq qorǵaý qyzmetin reformalaýǵa qatysty Jarlyǵyna sáıkes 9 zań jobasy ázirlendi
ASTANA. Tamyzdyń 26-sy. QazAqparat /Qanat Mámetqazyuly/ - Memleket Basshysynyń «Qazaqstan Respýblıkasynda quqyq qorǵaý qyzmeti men sot júıesiniń tıimdiligin arttyrý jónindegi sharalar týraly» jarlyǵyn júzege asyrýdy zańnamalyq qamtamasyz etý júrgizilýde.
Osy maqsatta vedomstvoaralyq komıssııanyń 224-shi otyrysy ótip, 9 zań jobasynyń tujyrymdamalary maquldandy. Bul týraly búgin QR Ádilet mınıstrliginde ótken brıfıng barysynda vedomstvonyń resmı ókili Erbolat Erimbet málim etti.
«Atap aıtqanda, zań jobalary boıynsha qylmystyq zańnamany odan ári izgilendirý, sot isin júrgizýdi jetildirý, sondaı-aq sotqa deıingi óndiriste sot baqylaýyn keńeıtý, medıtsınalyq aıyqtyrǵysh qyzmeti, sottalǵandarǵa qatysty keıbir bultartpaý sharalaryn qoldaný normalary qamtylady. Budan bólek, kámelet jasqa tolmaǵandardy ýaqytsha oqshaýlaý, beıimdeý men ońaltý ortalyqtarynyń qyzmeti, bıznes pen jeke menshiktegi múlikti zańsyz tartyp alýǵa (reıderlikke) qarsy turý jónindegi zań jobalary da ázirlenýde. Qazirgi ýaqytta jaýapty memlekettik organdar tıisti zań jobalaryn ázirleýde jáne olar jaqyn arada Úkimetke kelisý úshin engiziledi», dedi E. Erimbet.
