Elbasynyń kóshbasshylyq joly: Aqmolada ótken ashyq sabaqqa 144 myń jetkinshek qatysty
Aqmola oblystyq bilim basqarmasy baspasóz qyzmetiniń málimetinshe, Qazaqstan Respýblıkasynyń Tuńǵysh Prezıdenti kúni - elimiz úshin mańyzdy merekelerdiń biri. Elimizdiń egemendigin nyǵaıtý, ishki jáne syrtqy saıasattyń strategııalyq basymdyqtaryn, jahandyq jáne óńirlik bastamalardy iske asyrý boıynsha Nursultan Nazarbaevtyń 28 jylǵy qyzmetin búkil halyqaralyq qoǵamdastyqtyń moıyndaýy men qurmetiniń zańdy qorytyndysy.
«Elbasynyń kóregen bastamalarynyń arqasynda Qazaqstan halyqaralyq arenada moıyndalyp, álemdik qaýymdastyqtyń tolyqqandy múshesi boldy. Bizdiń memleketimizdiń EAEO, ShYU, Eýropadaǵy qaýipsizdik jáne Yntymaqtastyq Uıymyna, Islam Yntymaqtastyǵy Uıymyna, Ujymdyq qaýipsizdik týraly shart uıymyna tóraǵalyq etýi, 2017-2018 jyldarǵa arnalǵan BUU Qaýipsizdik Keńesiniń turaqty emes múshesi bolyp saılanýy jáne halyqaralyq EXPO-2017 kórmesin ótkizýi Qazaqstannyń jáne onyń Kóshbasshysynyń joǵary bedelin kórsetedi», - deıdi vedomstvonyń baspasóz qyzmeti.
Óńirdegi mektepter meen kolledjderde ótken ashyq sabaqqa qoǵam, mádenıet qaıratkerleri, aýdandyq jáne qalalyq máslıhat depýtattary, eńbek ardagerleri shaqyryldy. Mádenı storıtellıng barysynda belsendi dıalog ótkizildi. Onda balalarǵa Elbasynyń álemdik turaqtylyqqa, tártip pen qaýipsizdikke sózsiz úles qosqan bastamalary týraly baıandaldy. Qazaqstan Respýblıkasynyń Tuńǵysh Prezıdenti týraly derekti fılmder kórsetildi. Sporttyq jarystar men shyǵarmashylyq baıqaýlardyń jeńimpazdary marapattaldy. Mektep foıeleri jáne kitaphanalarda Tuńǵysh Prezıdenttiń ómiri men qyzmeti týraly fotomaterıaldardyń kórmesi uıymdastyrylyp, Elbasynyń taǵdyryna arnalǵan kitaptardyń tusaýkeseri ótti.
«Qazirgi zamanǵy Qazaqstan. Elbasynyń kóshbasshylyq sabaqtary» atty jalpy respýblıkalyq ashyq sabaqqa Aqmola oblysy boıynsha 556 mektep pen 33 kolledjdegi 144 myńnan astam oqýshy men stýdent qatysty», - deıdi vedomstvonyń baspasóz qyzmetindegiler.
