Elbasynyń QHA sessııasynda sóılegen sózin respondentterdiń 76 paıyzy tyńdaǵan - saýalnama nátıjesi

ASTANA. 2 mamyr. QazAqparat - Qazaqstan halqy Assambleıasynyń HІH sessııasynda Elbasy kótergen bastamalarǵa oraı «Nur Otan» HDP janyndaǵy Parlamentarızm ınstıtýty 28-30 sáýir aralyǵynda «Etnosaralyq qatynastar men jastar saıasaty salasyndaǵy jańa prezıdenttik bastamalar» taqyrybynda elimizdiń turǵyndary telefon arqyly saýalnama ótkizge bolatyn.

 Búgin atalǵan ınstıtýt ókilderi saýalnama nátıjelerin jarııa etti.

Parlamentarızm ınstıtýtynyń sarapshysy Saltanat Ermahanovanyń atap ótýinshe, zertteýge respýblıkanyń 14 oblysy men Astana, Almaty qalalarynda turatyn jasy 18-den asqan 1120 adam qatysqan.

«Saýalnamanyń alǵashqy suraǵy «Qazaqstan Respýblıkasynyń Prezıdenti N.Nazarbaevtyń Qazaqstan halqy Assambleıasynyń sessııasynda sóılegen sózimen tanyssyz ba?» degen saýal boldy. Bul saýalǵa respondentterdiń 76 paıyzy «ııa, tanyspyn» dep jaýap berdi. Naqty aıtqanda olardyń 61 paıyzy Elbasy sózin teledıdar arqyly tyńdaǵan. Al jańalyqtardan estigenderdiń úlesi 23 paıyzdy quraıdy», - dedi ol.

Onyń aıtýynsha, saýalnamaǵa qatysqandardyń 7,2 paıyzy Prezıdenttiń sózderin ınternetten oqysa, radıodan tyńdaǵandary - 4, gazetten oqyǵandary 3,8 paıyzdy quraıdy.

Sonymen qatar respondentter Elbasynyń sózin tyńdaǵannan keıin alǵan áserimen de bólisken. Máselen, saýalnamaǵa qatysqandardyń úshten biri qoldaıtyndyqtaryn, tórtten biri maqtanǵandyqtaryn, al 12 paıyzy qýanysh sezimde bolǵandyqtaryn aıtqan.