Elbasynyń qanatty sózderi: Qudaı qazaqtyń peıiline saı etip ulan-ǵaıyr jer bergen
«Qazirgi kezde qazaq jerine qatysty másele qoǵamymyzda qyzý talqylanyp jatqany belgili. Memleket basshysy búgin ótken Qazaqstan halqy Assambleıasynyń HHІV sessııasy barysynda bul jónindegi berik baılamyn bildirdi. «Jer - ata-babamyzdan bizge mıras bolyp qalǵan eń basty qazynamyz, ultymyzdyń uly baılyǵy. Qazaqtyń dalasy - halyqtyń menshigi» dep túıindegen Prezıdent pikiri kóptiń kóńilindegi túıtkildi tarqatyp, kúmándi seıiltkendeı.
El men jer uǵymyn eshqashan bóle-jara qaramaıtyn Elbasynyń bul taqyrypta sóz sabaqtaýy, árıne, birinshi ret emes. Osy oraıda Feısbýk paıdalanýshylary nazaryna Nursultan Ábishulynyń qazaq jeri týraly túrli kezderde aıtqan qanatty sózderiniń toptamasyn usynyp otyrmyz», delingen habarlamada.
***
Qasıetti qazaq jeri - ata-babalarymyzdyń dańqty tarıhyn atynyń tuıaǵymen jazyp ketken jer.
***
Qazaq dalasy - Uly Túrki eliniń qara shańyraǵy.
***
«Kóshpeliler» mal jaıyp ótken jeriniń bárin ózderiniki sanaı bergen» deıtin sandyraqty ǵylymı turǵydan áshkereleý shart.
***
Memleketimizdiń dińgegi - qazaq halqy. El de, jer de - qazaqtiki. El bolýdyń uıaty da - bizdiń jurttyń moınynda.
***
Jer jaqyndyǵy taǵdyryń men tarıhyńdy jaqyndastyrmaı qoımaıdy. Jer taǵdyry - el taǵdyry.
***
Jer abattansa, el abattanady.
***
Qazaqtyń keń baıtaq jerinde ańyzǵa aınalmaǵan tus tipti az, bári de qasterli ólke, qasıetti meken.
***
Jerden ótken baılyq joq: jer bolsa - el bolady, el bolsa - er bolady.
***
Qudaı qazaqqa qyryn qaramaǵan: peıiline saı etip ulan-ǵaıyr jer bergen, asty-ústin toltyryp ken bergen, meıirban, aq kóńil, adal el bergen, jany úshin malyn, ary úshin janyn sadaǵa etetin er bergen.
***
Qazaqtyń qasıetti jeriniń asty da - baılyq, ústi de - baılyq.
***
Elińniń uly bolsań, elińe janyń ashysa, azamattyq namysyń bolsa, qazaqtyń ulttyq jalǵyz memleketiniń nyǵaıyp-kórkeıýi jolynda jan terińdi syǵyp júrip eńbek et. Jerdiń de, eldiń de ıesi óziń ekenińdi umytpa!