Elbasynyń qanatty sózderi koreı tiline aýdaryldy
ASTANA. QazAqparat - Ótken aptada memlekettik jáne jergilikti basqarý salasynyń mamany, shyǵystanýshy, aýdarmashy Dastan Aqash koreı tiline aýdarǵan Elbasy Nursultan Nazarbaevtyń «Qanatty sózderi» «Hanın ılbo» dep atalatyn koreı gazetinde jaryq kórdi, dep habarlady www.24.kz «Aıqyn» gazetine silteme jasap.
Qazaq baspasózi betterinde jıi aıtylyp júrgen Elbasynyń sózderi tuńǵysh ret shyǵys tiline aýdarylyp otyr. Atalǵan qanatty sózder men dıplomat, ǵalym, bıznesmen jáne zertteýshi jastar tanysýda. Shyn máninde, Prezıdenttiń sózderi jaı aıtylǵan sóz emes. Ol memleket jáne qoǵam úshin aıtylǵan. Sondyqtan onymen sheteldikterdiń tanysyp-oqýy tıis. Sol arqyly ulttar dostyǵy arta túsedi. Mádenı baılanystar damıdy jáne keleshekte qazaq eliniń búgingi tarıhy men ekonomıkasynyń damýy týraly kólemdi eńbek jazatyn zertteýshiler N. Nazarbaevtyń naqyl sózderine mán berip, ony ǵylymı eńbekterine arqaý etýi ábden múmkin. Óıtkeni «Aldymen - ekonomıka, sodan keıin - saıasat» degen álemdik deńgeıdegi saıasatkerdiń oılary barlyq oqyrmannyń qyzyǵýshylyǵyn oıatady. Elbasynyń «Adam atymen emes, isimen máńgilik» degen sózi memlekettiń muratyn baıqatsa, «Bıznes qýatty bolsa, memleket te qýatty bolady» degen sózder bıznesti jolǵa qoıǵan koreılerge qatty unary anyq.
