Elbasynyń ıdeıasy boıynsha Almaty mańynda jańadan 4 qala salynady

Bul týraly búgin Astanada Qazaqstan jáne Koreı elderi delegattarynyń qatysýymen turǵyn úı salasyna qatysty ótken semınarda «G4 City»  JShS-nyń bas dırektory Dmıtrıı Pak aıtty, dep habarlaıdy QazAqparat. D.Paktyń atap kórsetkenindeı, Almaty qalasynda 4 seriktes qalany salý ıdeıasy el Prezıdenti N.Nazarbaevqa tıesili jáne ol Ortalyq Azııada teńdesi joq biregeı joba. Jospar boıynsha jańa qalalar Almaty-Qapshaǵaı kúre jolynyń boıyna salynady.

Onyń júzege asyrylý merzimi 2030 jylǵa deıin. Gate Sity  - Almaty qalasynan eki shaqyrym jerde boı kóteretin birinshi qala. Qala ulttyq jáne aýmaqtyq deńgeıdegi iskerlik jáne qarjylyq ortalyq bolady. Osynda sondaı-aq Memlekettik baǵdarlama boıynsha turǵyn úı keshenderi salynady. Golden City dep atalatyn ekinshi qala mádenı-oıyn saýyq jáne bilim berý ortalyǵy bolady. Qalada halyqaralyq standarttar boıynsha olımpıadalyq stadıon,safarı-park, attraktsıondar parki, tennıs korttary men golf alańdary, sondaı-aq stýdenttik qalashyq pen ýnıversıtet salynady. Sonymen qatar onyń aýmaǵynda medıtsınalyq jáne bilim berý klasterleri ornalastyrylady.

Al Growing City qalasy - logıstıka nysandary men ǵylymı-óndiristik keshenderi bar ǵylym men jańa tehnologııalar qalasyna aınalmaq. Qalada qonaq úıler jelisi, kórme ortalyqtary salynady. Demalý, kóńil kóterý jáne týrızm qalasy sanalmaq Green Sity qalasynda, jasandy sý arnalary arqyly shıpajaılar, oıyn-saýyq ortalyqtary, jyl boıy jumys isteıtin demalý oryndary jáne jarysqa arnalǵan joldar bolady. «Búgingi kúni qalalar jobalaý satysynda. Ótken aptada alǵashqy eki qalanyń jobasyn Úkimet basshysyna tanystyrdyq. Qazir qolymyzda bekitilgen bas jospar bar dep aıtýǵa bolady. Qalanyń qurylysy eń aldymen ınjenerlik ınfraqurylymnan bastalatyn bolady», - deıdi ol. D. Pak: «jobany júzege asyrýǵa shet elderden ınvestıtsııa kózderi tabylyp otyrǵanymen, qurylys jumystarynyń bastalý merzimi áli de belgisiz», - dedi.