Elbasynyń halyqtar dostyǵy, beıbitshilik, tatýlyq týraly oılary eshqashan eskirmek emes - 76 jastaǵy keıýana
ASTANA. QazAqparat - Búgin Qazaqstan halqynyń birligi kúni! Bul mereke qazirgi kezeńde óte-móte mańyzdy shara. Barlyǵymyz búgin úıde otyra almaı, Qazaq eli alańyna kelip, bir-birimizdi merekemen quttyqtap máz-meıram bolyp qaldyq, deıdi 76 jastaǵy nemere-shóbere ósirip otyrǵan Keńdik Baımaǵambetova áje.
Ol kisi de búgin barsha halyqpen birge alańǵa shyǵyp, Qazaqstan halqynyń birligin kúnin toılaýda.
«Biz ózimizdiń Otanymyzdy, osyndaı deńgeıge jetkenimizdi maqtan etemiz. Munyń barlyǵy birinshiden, qazaq halqynyń tarıhı mentalıtetiniń arqasy, ekinshiden, árıne, osynshama halyqty aırandaı uıytyp, birlikke shaqyryp, uıymdastyra alatyn adam bolýy kerek. Ony uıymdastyrýshy - bizdiń Elbasy Nursultan Nazarbaev», - dep atap ótti Keńdik áje.
«Óz basym ol kisiniń árbir sózin qalt jibermeı tyńdap júremin. Jýyrda Máskeý memlekettik ýnıversıtetinde oqyǵan lektsııasy da jan-jaqtylyǵymen, tereń ári jeńil túsiniletin maǵynalylyǵymen janyma jaqyn jylylyǵymen este qaldy», - deıdi K. Baımaǵambetova.
Onyń aıtýynsha, 50 jyl ustazdyq qyzmet etipti.
«Sondyqtan Elbasynyń ár eńbegin qalt jibermeı oqyp otyramyn. Eń birinshi «HHІ ǵasyr tabaldyryǵynda» atty kitabynan bastap taldap-taldap, oqýshylarǵa nasıhattap kelemin. Ózim 72 jasyma deıin oqýshylarǵa bilim úıretýmen boldym. Áli de shákirtterimnen qol úzgen joqpyn», - deıdi áje.
Sózin qorytyndylaı kele Keńdik áje: «Elbasynyń halyqtar dostyǵy, beıbitshilik, tatýlyq týraly oılary eshqashan eskirmek emes!
Mereke qutty bolsyn! Aspanymyz ashyq, dostyǵymyz máńgi bolsyn!», - dep aq batasyn berdi.
