«Elbasynyń eren eńbegin jyrlaǵanda, kózime jas keldi» - baspasózge sholý
***
«Egemen Qazaqstan» gazetiniń búgingi sanynda Memleket basshysy Nursultan Nazarbaevtyń elordanyń 15 jyldyq mereıtoıyna arnalǵan «Astana - Qazaqstannyń uly dáýiri jáne strategııalyq vektory» degen taqyryptaǵy maqalasy jaryq kórdi. Onda Elbasy: «Bizdiń elordamyzdyń aty qazirdiń ózinde Eýrazııa men Soltústik Amerıkadan 56 eldiń memleket pen úkimet basshylaryn jınaǵan Eýropadaǵy qaýipsizdik jáne yntymaqtastyq uıymynyń HHІ ǵasyrdaǵy alǵashqy sammıti ótkizilgen jer retinde jahandyq tarıhqa endi. Tek ótken tórt jyl bederinde ǵana qala VII Azııa oıyndaryn, Búkilálemdik týrıstik uıymy Bas assambleıasynyń XVIII sessııasyn, Islam yntymaqtastyǵy uıymy Syrtqy ister mınıstrleri keńesiniń XXXVIII sessııasyn qabyldady», - dep jazady.
«Daǵdarystan keıingi álem» halyqaralyq qorynyń zertteýleri qorytyndysy óz eline orasan zor paıda ákelgen ult kóshbasshylaryn da anyqtady. Sol tizimdegi úzdik bestiktiń qatarynan Qazaqstan Prezıdenti Nursultan Nazarbaev ta oryn aldy», - dep jazady «Egemen Qazaqstan» senbilik sanyndaǵy «Álemdegi úzdik 5 lıderdiń biri» degen taqyryptaǵy maqalasynda. Basylymnyń jazýynsha, top-5 kóshbasshylaryn Germanııanyń kantsleri Angela Merkel bastaıdy. Al budan keıingi oryndarǵa Qytaıdyń eks-basshysy Hý Tszıntao, Reseı Prezıdenti Vladımır Pýtın, Venesýelanyń burynǵy lıderi Ýgo Chaves jáne Qazaqstan Prezıdenti Nursultan Nazarbaev ornalasqan. Sarapshylardyń paıymynsha, keshegi keńestik keńistikten shyqqan jas memleketter úshin osy kezge deıin shyn máninde «mamyra-jaı zaman» bolǵan emes. Olardyń táýelsizdik jyldarynan bergi árbir jyly men aıy, aptasy men kúni udaıy ilgeri umtylýmen, únemi áldeneni izdestirýmen, árdaıym ár nárseni jetildire túsý jolynda tirlik etýmen ótip keledi. Munyń bári, aınalyp kelgende, bul elderdiń irgelerin bekitip, keregelerin nyqtaýlaryna arnaldy. Solardyń arasyndaǵy Nursultan Nazarbaevtyń belsendi qımyly men mıssııasy qashanda «memlekettik menedjmenttik» sheńberi aıasynan shyǵyp ketip, Ulttyń atasy degen sıpattamanyń qaýyzyna laıyq keletin ulan-ǵaıyr tirliktermen ushtasyp jatty.
***
«Aıqyn» gazetiniń búgingi nómirinde Júrsin Ermanovpen aradaǵy suhbat «Elbasynyń eren eńbegin jyrlaǵanda, kózime jas keldi» degen taqyryppen berilgen. Basylym tilshisiniń barlyq saýalyna tuşymdy jaýap bergen ol: «Jalpy, sońǵy ótken eki Prezıdent saılaýynda Nursultan Ábishulyn qoldaý maqsatynda «Elbasy - erteńimiz, Abylaı - aıbarymyz», «El basqarǵan eriń kim?» degen atpen eki aıtys uıymdastyrdyq. Ekeýinde de el azamattarynyń jaqsy isteri, memleketimizdiń syndarly saıasaty taqyrypqa arqaý boldy. Tipti aqyndar Elbasynyń eren eńbegin jyrlaǵanda, kózime jas keldi. Men jylamaıtyn adammyn. Biraq sonshama jetistikterdi tilge tıek etkende tolqyp kettim. Árıne, «Er bolsań, bopsaǵa shyda» degendeı, keıbir jetpeı jatqan tustarymyz da aıtyldy. Jaqsylyq pen kemshilikti qatar alyp júrý aıtystyń tarıhynda bar dúnıe. Sondyqtan oǵan tózimdilikpen, túsinistikpen qaradyq», - deıdi.
Osy basylymnyń jazýynsha, Aqtóbe oblysynyń medıtsınalyq mekemelerinde dárigerler tapshy. Bul jaıynda oblystyq densaýlyq saqtaý basqarmasy bóliminiń basshysy Gúlbarshyn Esenbaeva málim etken. Mekeme ókiliniń aıtýynsha, aýdandyq medıtsınalyq uıymdarda 76 dáriger jetispeıdi, qalalyq uıymdarda 72 dáriger orny bos tur.Eń kóp tapshylyq Oıyl, Muǵaljar, Áıteke bı, Alǵa, Hromtaý, Baıǵanın jáne Qobda aýdandarynda baıqalady. Jalpy tájirıbeli 25 dáriger, 7 akýsher-gınekolog, 5 pedıatr jáne 5 oftalmolog tapshy.Jyl saıyn bıýdjetten aýylǵa baratyn jas mamandar úshin qarajat bólinýde. Bir jolǵy járdemaqy 70 aılyq esep kórsetkishin (121 170 teńgeni) quraıdy. Odan bólek, qazirgi zańnamamen turǵyn úı satyp alý úshin 1500 aılyq esep kórsetkishi (2 596 500 teńge) kóleminde 15 jylǵa deıingi merzimge jeńildikpen nesıe berý qarastyrylǵan.
