Elbasynyń eńbeginiń zor ekenin eskerýimiz qajet - Jaqsybaı Bázilbaev
ALMATY. 16 aqpan. QazAqparat /Erbol Turymbetov/ - Referendýmǵa qarsylyq bildirip, merziminen buryn Prezıdenttik saılaý ótkizý arqyly Prezıdent durys sheshim qabyldap otyr.
Jemqorlyqqa qarsy respýblıkalyq komıtet tóraǵasy, QR Prezıdenttigine eks-kandıdat Jaqsybaı Bázilbaev búgin jýrnalıstermen prezıdenttik saılaý aldyndaǵy eldegi saıası jaǵdaıǵa qatysty óz pikirimen bólisti.
Onyń aıtýynsha, Prezıdenttik saılaý aldyndaǵy eldegi saıası jaǵdaı turaqty qalypta. «Men QR Tuńǵysh Prezıdenti Nursultan Nazarbaevtyń prezıdenttik ókilettigin uzartý jóninde referendým ótkizýdi qoldamadym. Degenmen, Elbasynyń eldegi saıası ahýaldy baǵamdap, qarsy pikirlerdi eskere otyryp kezekten tys Prezıdenttik saılaý ótkizý jóninde sheshim qabyldaǵanyn tolyq quptaımyn»,- deıdi J. Bázilbaev.
Onyń sózine qaraǵanda, sońǵy ýaqyttaǵy elimizde ótken EQYU Sammıti, 7-qysqy Azııa oıyndary Nursultan Nazarbaevtyń eldi durys baǵytta basqaryp otyrǵandyǵynyń jemisi. «Halyqaralyq deńgeıde úlken mańyzy bar mundaı sharalardyń elimizde ótýi Qazaqstannyń álemdegi bedelin arttyra túseri sózsiz. Bul turǵyda Elbasynyń eńbeginiń zor ekenin eskerýimiz qajet», -dedi ol.
Jaqsybaı Bázilbaev 1999 jyly «Alash» ulttyq-patrıottyq partııasyn qurýshylardyń biri. 2006 jyly Qazaqstannyń ulttyq-patrıottyq qozǵalystary birlestigi komıtetiniń tóraǵasy bolyp saılandy. Sondaı-aq, ol 1998-1999 jáne 2005 jyldardaǵy QR Prezıdenttiginiń eks-kandıdaty bolyp tabylady.
