Elbasynyń densaýlyǵyna alańdaýǵa negiz joq - Aıdos Úkibaı
«Aı bastalǵaly Nursultan Nazarbaevtyń jumys kestesi óte tyǵyz boldy. Elbasy ekijaqty kelissózder júrgizip, resmı tulǵalardy qabyldady.
Oǵan qosa, Tuńǵysh Prezıdent otandyq jáne sheteldik BAQ ókilderine suhbat berdi. Jalpy alǵanda televızııalyq túsirim úshin 40 adam jumys istedi, onyń ishinde shet eldiń azamattary da bar.
Nursultan Nazarbaevtyń jaǵdaıyn medıtsına qyzmetkerleri baqylap otyr. Alańdaýǵa negiz joq. Elbasy zamanaýı kommýnıkatsııa arnalaryn paıdalanyp qashyqtan jumys istep jatyr.
Bekitilgen hattamaǵa sáıkes, Tuńǵysh Prezıdenttiń basqa tulǵalarmen baılanysy shekteldi. Elbasy qatysatyn josparlanǵan keıbir is-sharalar beınekonferentsbaılanys túrinde onlaın rejımde ótedi.
Resmı habar taraǵan alǵashqy mınýttan bastap Tuńǵysh Prezıdenttiń densaýlyǵyna alańdaǵan jáne tezirek saýyǵyp ketýin tilegen azamattardan hat alyp jatyrmyz. Meniń telefonym habarlasqandar men messendjerlerden kelgen habarlamaǵa tolyp qaldy. Jýrnalıster, dostar, týystar, áriptester habarlasyp Elbasyǵa kúsh-qýat pen myqty densaýlyq tilep jatyr. Olardyń qatarynda jaqyn jáne alys shetelden habarlasqandar bar. Tuńǵysh Prezıdentke Memleket basshysy Qasym-Jomart Toqaev a qoldaý bildirdi, elimizdiń barlyq aımaǵynan Elbasy Keńsesine jedelhat kelip túsip jatyr.
Nursultan Nazarbaev qazaqstandyqtar men barlyq alańdap otyrǵan adamdarǵa alǵys bildiredi», - dedi Aıdos Úkibaı.
