Elbasynyń BUU minberinde sóılegen sózi Qazaqstan úshin asa zor strategııalyq mańyzǵa ıe - Q. Toqaev
ASTANA. QazAqparat - Elbasynyń BUU minberinde sóılegen sózi Qazaqstan úshin asa zor strategııalyq mańyzǵa ıe. Búgin Senattyń jalpy otyrysy barysynda spıker Qasym-Jomart Toqaev osylaı málimdedi.
«BUU Bas Assambleıasynyń tarıhı mereıtoılyq sessııasynda sóılegen sózinde Elbasy N. Nazarbaev álemdik daǵdarysty eńserý jáne halyqaralyq qaýipsizdikti nyǵaıtýda orasan zor máni bar naqty bastamalardy kóterdi. Prezıdent HHІ ǵasyrdaǵy ıadrosyz álem qalyptastyrýdyń jańa bolashaqtyq tujyrymdamasyn, Halyqaralyq terrorızmge qarsy kúrestiń dúnıejúzilik jelisin qurý qajettigin málimdedi. Zamanymyzdyń asa tájirıbeli saıasatkeri, Azııadaǵy qaýipsizdiktiń irgetasyn qalaýshy, Eýrazııalyq yqpaldastyqtyń negizin salǵan Prezıdentimizdiń bastamalary halyqaralyq saıası jáne dıplomatııalyq qaýymdastyqtyń asa joǵary qyzyǵýshylyǵyn týdyratyny daýsyz. Búginde bul bastamalarǵa álemniń jetekshi memleketteri nazar aýdarýda. Prezıdentimizdiń álemniń basty minberinde sóılegen sózi Qazaqstan úshin asa zor strategııalyq mańyzǵa ıe. Bul bastamalar qazirgi qubylmaly álemde elimizdiń ustanymdaryn ary qaraı nyǵaıta túsedi», - dedi Q. Toqaev.
Sonymen qatar, Palata Tóraǵasy búgingi otyrysta elimizdiń ishki áleýetin kúsheıtetýge baǵyttalǵan Prezıdenttiń «100 naqty qadam» atty Ult josparyn iske asyrýdy kózdeıtin zań jobalary talqylanatynyn eske salyp, bul jumystyń nátıjeli bolatynyna senim bildirdi.
«Qazaqstannyń halyqaralyq bedelin arttyryp, qoǵamda turaqtylyq pen kelisimniń nyǵaıýyna Senat depýtattary óz úlesin qosatyny sózsiz», - dedi spıker Q. Toqaev.
