Elbasynyń BUU-daǵy ótkir usynystary
ASTANA. QazAqparat - Qazaqstan Respýblıkasynyń Prezıdenti Nursultan Nazarbaev Birikken Ulttar Uıymy Bas Assambleıasynyń sessııasynda sóılegen sózderinde jalpy álemdik qoǵamdastyqqa ortaq máselelerdi kóterdi, keleli usynystardy ortaǵa saldy.
Elbasy Nursultan Nazarbaevtyń BUU-nyń mereıtoılyq sessııasynda sóılegen sózderin usynamyz.
Qazaqstan halyqaralyq qatynastardaǵy ózara senimdi qalpyna keltirýge, halyqaralyq quqyqtyń negizinde beıbitshilik pen qaýipsizdikti nyǵaıtýǵa baǵyttalǵan barlyq bastamalardy qoldaıdy.
Men jer betindegi órkenıet taıaýdaǵy otyz jylda soǵystar men qaqtyǵystardyń shıelengen túıinin danalyqpen tarqatý úshin kúsh-jiger taba alatynyna senimdimin.
HHІ ǵasyrda adamzattyń eń basty mindeti álemdi soǵys qaterinen múlde aryltatyn jáne onyń sebepterin joıatyn strategııany júzege asyrý bolýǵa tıis.
Birikken Ulttar Uıymynyń 100 jyldyǵyna Jahandyq Strategııalyq Bastama - 2045 josparyn ázirleýdi usynamyn. Onyń máni - álemdik damýdyń jańa trendin qalyptastyrý.
Men Birikken Ulttar Uıymynyń Ekonomıkalyq jáne áleýmettik keńesin Jahandyq damý keńesine aınaldyrýdy usynamyn.
Jobasy Astana ekonomıkalyq forýmy aıasynda qyzý talqylanyp kele jatqan Daǵdarysqa qarsy dúnıejúzilik jospar ıdeıasy óte ózekti bolyp kórinedi.
Álemdi alańdatyp otyrǵan terrorızm, memleketterdiń kúıreýi, kóshi-qon jáne ózge de keleńsiz qubylystar ekonomıkalyq daǵdarystyń, kedeıshiliktiń, saýatsyzdyq pen jumyssyzdyqtyń saldarlary.
HHІ ǵasyrda álemge sapalyq turǵydan jańa qarjy quraldary kerek. Osy oraıda, jahandyq ornyqty damý men ósip-órkendeýdiń maqsattary men mindetterine saı keletin ultústilik álemdik valıýta qajet.
Hırosıma men Nagasakıdi atom qarýymen bombalaýdan soń 70 jyl ótkende ıadrolyq qarýsyz álem qalyptastyrý isin adamzattyń HHІ ǵasyrdaǵy basty maqsaty etýge shaqyramyn.
BUU-nyń ıadrolyq qarýdan azat álemge qol jetkizý jónindegi Jalpyǵa ortaq deklaratsııasyn qabyldaýdy usynamyn.
Jahandyq antııadrolyq qozǵalys qurý mańyzdy mindet bolyp otyr. Jer betindegi árbir adam ıadrolyq synaqtarǵa tyıym salý isine óz úlesin qosa alady.
Sanktsııalardy BUU-nyń Jarǵysy men halyqaralyq quqyq normalaryna qaıshy keletin áreket retinde baǵalap, olardyń óz betimen qoldanylýyn boldyrmaý qajet.
Mıllıondaǵan adamdardyń ıgiligine áser etetin halyqaralyq sanktsııalar qoldaný quqyǵy Qaýipsizdik Keńesiniń erekshe quzyrynda bolýǵa tıis.
2016 jyly BUU-nyń halyqaralyq quqyqtyń arqaýlyq qaǵıdattaryn bekitýge arnalǵan joǵary deńgeıdegi halyqaralyq konferentsııasyn shaqyrýdy usynamyn.
Terrorızm men dinı ekstremızmniń qaýpi jahandyq aýqymǵa aınalyp barady. BUU-nyń qoldaýymen halyqaralyq terrorızm men ekstremızmge qarsy tura alatyn biryńǵaı álemdik jeli qurýdy usynamyn.
Bolashaqty eskerip, «EKSPO-2017» kórmesi ınfraqurylymy negizinde Astanadan BUU-nyń qoldaýymen Jasyl tehnologııalardy jáne ınvestıtsııalyq jobalardy damytý jónindegi halyqaralyq ortalyq ashýdy usynamyn.
HHІ ǵasyrda Damý ortalyǵy álemniń eń úlken kontınenti - ǵalamshar turǵyndarynyń úshten ekisi mekendeıtin, iri resýrstar shoǵyrlanǵan Azııaǵa qaraı oıysady.
BUU-nyń shtab-páterin Azııaǵa kóshirý máselesin oılastyrýdy usynamyn. Qazaqstannyń bastamalaryn Ulttar qaýymdastyǵy qabyldaıdy dep zor úmit kútemin.
"Egemen Qazaqstan" gazeti
