Elbasynyń bıylǵy Joldaýynyń ereksheligi - áleýmettik salaǵa kóp kóńil bólinip otyrǵandyǵy - aýdan ákimi

Atalǵan aýdannyń ákimi Bekqalı Torǵaev: "Elbasynyń bıylǵy halyqqa Joldaýynyń ereksheligi áleýmettik salaǵa kóp kóńil bólinip otyrǵandyǵy", - deıdi. Onyń aıtýynsha, bul aýdannyń halqy basqalarǵa qaraǵanda kóp bolyp sanalady, sondyqtan Elbasynyń Joldaýynda aıtylǵan kóptegen máseleler osy aýdanǵa da tıesili.

«Elbasynyń Joldaýynda bıylǵy jyldyń 1 mamyryna deıin Úkimet pen ár deńgeıdegi ákimderge ózderiniń baǵdarlamalaryn bekitý tapsyrylǵan bolatyn. Onyń biri - turǵyn úılerdiń kommýnaldyq sharýashylyq máselelerin sheshý. Bizdiń aýdan boıynsha 1752 turǵyn úı, 17 myńǵa jýyq jeke úı bar. Mine, bularda da isten shyqqan qubyrlar sııaqty máseleler bar. «Jol kartasy» baǵdarlamasy aıasynda da kóptegen jumystar atqarylyp, jóndeý men qaıta aýystyrý isteri atqarylǵan bolatyn. Degenmen, Keńes ókimeti kezinen beri jóndeý kórmegen kommýnaldyq sharýashylyqtyń qaıta jóndeýdi qajet etip otyrǵan tustary áli de bar. Mine, osy jolǵy tapsyrmadan keıin sondaı máseleler óz sheshimin tabady dep oılaımyn», -deıdi aýdan ákimi.

Sonymen qatar ol Elbasy aýyz sý, jumyspen qamtý sııaqty kúrdeli máselelerdi sheshýdi alǵa qoıǵandyǵyn aıtyp ótti. «Osynyń barlyǵy bıylǵy Joldaýda áleýmettik salaǵa kóp kóńil bólinip otyrǵandyǵynyń belgisi. Sondyqtan Prezıdenttiń Joldaýyna aýdanymyzdyń barlyq turǵyny mán berip, onyń oryndalýyna óz úlesterin qosady dep bilemin», -dep atap ótti óz sózinde B.Torǵaev.

Jıynǵa atalǵan aýdan turǵyndary, sot tóraǵalary, memlekettik jáne quqyq qorǵaý organdarynyń basshylary, máslıhat depýtattary, kásiporyndar men shaǵyn kásipkerlik, bilim, densaýlyq saqtaý salasynyń qyzmetkerleri, mádenıet qaıratkerleri, aýdandaǵy qoǵamdyq uıymdar ókilderi, páter ıeleri kooperatıvteriniń tóraǵalary, ǵylym salasynyń ókilderi men aýdan ardagerleri qatysyp, Joldaýda aıtylǵan mańyzdy jaıttardy talqylap, baıandamalar jasady.