Elbasynyń bıylǵy Joldaýynda halyqtyń ál-aýqatyn jaqsartýǵa óte kóp kóńil bólingen - QazUTÝ rektory
ALMATY. 28 qańtar. QazAqparat- /Ádilet Musahaev/ - Elbasynyń bıylǵy Joldaýynda halyqtyń ál-aýqatyn jaqsartýǵa óte kóp kóńil bólingen. Bul jaıynda Q. Sátbaev atyndaǵy QazUTÝ-diń rektory Jeksenbek Ádilov QazAqparat tilshisine Joldaý jaıyndaǵy pikirin bildirý kezinde aıtty.
J.Ádilov Prezıdent bilim sapasyn kóterý jóninde de ónegeli oılar aıtqandyǵyn jetkizdi. «Ýnıversıtettiń qabyrǵasynda stýdentterge durys bilim bermeı, nashar mamandardy daıyndasaq, keıin olar qyzmet ornyna barǵanda nátıjeli is kórsete almaıdy. Sondyqtan Elbasy óte jaqsy aıtyp ketti, dıplom aldym, endi boldy degen jón emes. Ár azamat ómir boıy oqý kerek. Tek sonda ǵana atqarǵan isińniń jemisti bolatyny aıqyn ekendigin basa aıtty», - deıdi rektor.
«Elbasy óz Joldaýynda stýdentterdiń shákirtaqysy, zeınetkerlerdiń zeınetaqysy jáne memlekettik mekemelerdegi qyzmetkerlerdiń jalaqysy kóteriletindigin aıtty. Bul Prezıdenttiń halyqqa jasap otyrǵan úlken qamqorlyǵy dep bilem», - deıdi ol.
Sonymen qatar ol bıylǵy Joldaýda elimizdegi sýdyń sapasyn kóterý men turǵyn úı-kommýnaldyq sharýashylyǵy tóńiregindegi ózekti máselelerdi sheshý kerektigi aıtylǵandyǵyn jetkizdi. «Ondaı ispen aınalysatyn mamandar kóbine bizdiń oqý ornynda daıyndalady. Sondyqtan bizdiń ýnıversıtettiń oqytýshylar qaýymy men stýdentteri Elbasynyń alǵa qoıǵan maqsattaryn qoldap, ony atqarýǵa biraýyzdan atsalysady», - dedi Jeksenbek Ádilov.
