Elbasynyń bıylǵy halyqqa Joldaýynda el damýynyń negizgi eki baǵyty kórsetilgen - N.Aldabergenov
ALMATY. 28 aqpan. QazAqparat /Ádilet Musahaev/ - Elbasynyń «Bolashaqtyń irgesin birge qalaımyz» atty halyqqa Joldaýynda el damýynyń negizgi eki baǵyty kórsetilgen.
Ol ındýstrııalyq-ınnovatsııalyq baǵdarlamanyń jalǵasyn tabýy jáne jańa áleýmettik saıasat. Bul jaıynda búgin QR Tabıǵı monopolııalardy retteý agenttiginiń tóraǵasy Nurlan Aldabergenov Almatydaǵy QazEÝ-diń oqytýshy jáne stýdentter qaýymymen kezdesý barysynda aıtty.
Ol Prezıdentimiz N.Á. Nazarbaevtyń bıylǵy halyqqa Joldaýynda alǵa qoıylǵan basty tapsyrmalar men mindetterine toqtalyp, olardyń mańyzdylyǵyn keńinen túsindirip ótti.
N.Aldabergenovtyń aıtýynsha, ındýstrııalyq-ınnovatsııalyq baǵdarlama boıynsha kásiporyndardyń odan ári damyp, básekege qabiletti ónim shyǵarýy úshin olarǵa ınvestıtsııa tartý isi jalǵasyn tapsa, jańa áleýmettik saıasat aıasynda bilim, densaýlyq saqtaý jáne tildi damytý sııaqty negizgi úsh másele alǵa qoıylǵan. «Joldaýda 2020 jylǵa deıin 12 jyldyq mektep baǵdarlamasyna kóshýdi aıaqtaý mindeti alǵa qoıyldy. Ol úshin 2015 jylǵa deıin 400-ge deıin mektep salý qajettigi aıtyldy. Sondaı-aq elimizdiń JOO-nyń sapasyn arttyryp, otandyq eki ýnıversıtet álemdik jetekshi oqý oryndardyń qataryna qosylý kerektigin aıtty», - deıdi ol.
Sonymen qatar ol 2013 jyly ulttyq biryńǵaı densaýlyq saqtaý júıesine kóshý isi aıaqtalatyndyǵyn jáne elimizde jurtshylyqtyń densaýlyǵyn baqylaıtyn baǵdarlamalar kesheni qurylatyndyǵyn jetkizdi. "Elimizdiń aýyl nemese qalada turatyn ár azamatyna kórsetiletin medıtsınalyq kómekti jaqsartyp, medıtsınalyq kólikpen jáne shuǵyl qımyldaıtyn tikushaqtarmen qamtamasyz etý mindetteldi", - dep atap ótti N.Aldabergenov.
Sondaı-aq ol: " Tilderdi damytý baǵdarlamasy aıasynda 2017 jylǵa qaraı elimizdiń turǵyndarynyń 80 paıyzy memlekettik tildi meńgerý kerektigi, al 2020 jylǵa qaraı olardyń kórsetkishi 90 paıyzdan kem bolmaý qajettigi atap kórsetilgen" - dedi.
