Elbasynyń bıylǵy halyqqa Joldaýy - aıqyn maqsat pen naqty josparlarǵa baǵyttaıdy - PhD doktoranty
ALMATY. 28 qańtar. QazAqparat /Ádilet Musahaev/ - QR Prezıdenti Nursultan Nazarbaevtyń halyqqa dástúrli Joldaýy aıqyn maqsat pen naqty josparlarǵa baǵyttap, úlken mańyzdy máselelerdi arqaý etýimen erekshelenip otyr.
Bul jaıynda Maks Plank ınstıtýtynda ǵylymı tájirıbeden ótip jatqan Q.I.Sátbaev atyndaǵy Qazaq ulttyq tehnıkalyq ýnıversıteti PhD doktoranty Gúlnur Álimbekova QazAqparat tilshisine pikir bildirý kezinde aıtty.
Doktorant bıylǵy Joldaý barysynda áleýmettik-modernızatsııalaý, bilim jáne ǵylym salasy, densaýlyq saqtaý, memlekettik tildiń deńgeıin odan ári damytý sııaqty ózekti saýaldardyń nazarǵa alynýy atalmysh salalarǵa tyń serpilis beretindigin aıtady. "Ásirese, Elbasy bilim jáne ǵylym salasyn álemdik deńgeıge jetkizýde PhD doktorantýra, magıstratýra satysyna erekshe nazar aýdaryp otyrǵandyǵy jastarǵa úlken qoldaý bolyp tabylady. Men osy oraıda Q.I.Sátbaev atyndaǵy Qazaq ulttyq tehnıkalyq ýnıversıtetinde PhD doktorantýra boıynsha 2 kýrsta bilim alyp jatyrmyn. Búginde Germanııanyń Potsdam qalasynda Kolloıdtar jáne bettik qosylystar Maks Plank ınstıtýtynda tájirıbeden ótýdemin. Bul múmkindik Elbasynyń salıqaly saıasatynyń iske asyp, qoǵamǵa tıgizip jatqan paıdasy dep bilem", - deıdi G.Álimbekova.
Sonymen qatar ol aldyńǵy Joldaýlardaǵy atqarylǵan tapsyrmalar aqıqatqa aınalǵandyǵyn eskere otyryp, kezekti Joldaý densaýlyq, ǵylym, bilim, ekonomıkalyq damý salasynda úlken bastamalarǵa negiz bolatyndyǵy sózsiz deıdi.
