Elbasynyń balalyq shaǵy týraly jańa kitap jaryq kórdi
ALMATY. Maýsymnyń 21-i. QazAqparat /Názıra Eleýhan/ - Almatyda Elbasy Nursultan Nazarbaevtyń balalyq shaǵy arqaý bolǵan shyǵarmalardan turatyn "Tań nurynda týǵan ul" atty kitap jaryq kórdi. Kitaptyń avtory belgili balalar jazýshysy, Alash syılyǵynyń laýreaty Sháken Kúmisbaıuly.
Atalmysh kitap "Kitap" baspasynan 5000 danamen basylyp shyqty. Avtordyń aıtýynsha, bul jınaqqa buryn jaryq kórip, Elbasynyń jeke muraǵatyna qabyldanǵan birneshe áńgimelermen qatar, jańa shyǵarmalar engen.
Áńgimeler men hıkaıattardan turatyn shyǵarmalarda Elbasynyń qarshadaıynan eńbekti súıgendigi, qıyndyqtan qoryqpaı, bıik maqsatqa umtylǵandyǵy, kórgenderdiń kózimen bala tanymyna laıyqty baıandalǵan.
"Meniń shyǵarmalarymnyń arqaýy kóbine urpaq sabaqtastyǵy, atadan-balaǵa aýysyp kele jatqan salt-dástúr sabaqtastyǵy, týǵan el, týǵan jer, týǵan tilge adaldyq, aǵa urpaqtyń aldyndaǵy qaryz ben paryz syndy jas óskinge tálim-tárbıe beretin taqyryptar. Meniń pikirimshe, Elbasy - ár balaǵa mysal bola alatyn adam. Bul kitapty jazýdaǵy maqsatym da osy - úlgi bolarlyq tulǵany jaza otyryp, balalardy eldikke, patrıottyq sezimge tárbıeleý", dedi kitap avtory Sháken Kúmisbaıuly.
Kitap mektep oqýshylaryna, tárbıeshiler men ustazdarǵa jáne qalyń oqyrman qaýymǵa arnalǵan.
