Elbasynyń balalyq shaǵy týraly kitap jaryq kórdi
ALMATY. Qazannyń 19-y. QazAqparat /Erbol Azanbek/ - Elbasy Nursultan Nazarbaevtyń balalyq shaǵyn beıneleıtin «Úshqońyr-altyn besigim» atty kitap jaryq kórdi.
Búgin «Nur Otan»HDP Almaty qalalyq fılıalynda osy týyndynyń tanystyrylymy boldy.
Atalǵan kitaptyń avtory - Memleket basshysynyń synyptasy Sádýaqas Esimbaı. Shyǵarma Elbasynyń týǵan jer, ósken ortasy, ómir joly jaıynda syr shertedi. Sondaı-aq Jetisýdyń tarıhı adamdarynyń ómirleri týraly da baıandalǵan. «Elbasymen birinshi synyptan bastap, on jyl boıy jubymyz jazylmaı birge oqydyq. Onyń balalyq shaǵy túgeldeı kóz aldymda. Sondyqtan keıingi urpaq bile júrsin dep kóz aldymdaǵy kórinistiń barlyǵyn kitap betine túsirdim», - deıdi avtor.
Esterińizge sala keteıik, S.Esimbaı 2000 jyly «Balalyq shaqqa saıahat» atty fotoalbom shyǵarǵan edi. Onda QR Prezıdentiniń týyp-ósken jeri Shamalǵan óńiriniń tabıǵaty, tarıhı oryndary kórinis tapqan bolatyn.
