Elbasynyń Avstrııaǵa saparynyń qorytyndylary
ASTANA-VENA. 24 qazan. QazAqparat - Memleket basshysy Nursultan Nazarbaev 22-23 qazan kúnderi resmı saparmen Avstrııa Respýblıkasynda boldy.
Avstrııanyń federaldy Prezıdenti Haınts Fısher «Hofbýrg» saraıynyń aldyndaǵy alańda Qazaqstan Prezıdentin qarsy aldy.
Qazaqstannyń Ánurany shyrqalǵan soń, memleket basshylary qyzyl kilemmen Avstrııa federaldy Prezıdentiniń rezıdentsııasyna ótti, onda tar aýqymdaǵy jáne keńeıtilgen quramdaǵy kezdesýler ótti.
Kezdesýlerden keıin eki prezıdenttiń qatysýymen Júkterdiń halyqaralyq avtomobıl tasymaly jóninde QR Úkimeti men AR Úkimeti arasyndaǵy kelisimge qol qoıyldy, Qazaqstan Prezıdentiniń Avstrııanyń joǵary basshylyǵymen, saıası jáne iskerlik orta ókilderimen kezdesýleri, sondaı-aq qazaqstan-avstrııa bıznes-forýmy ótti.
Avstrııalyq kompanııalardyń kórmelerin aralaý barysynda memleket basshylary qazaqstan-avstrııa birlesken bıznes-jobalarmen tanysty. Keıin taraptar birqatar qujattarǵa qol qoıdy, atap aıtqanda, Qazaqstan-Avstrııa iskerlik keńesin qurý jóninde, QR Saýda-ónerkásip palatasy men Avstrııa Ekonomıka palatasynyń ekonomıkany damytý ınstıtýty arasynda memorandýmǵa, sondaı-aq «QazMunaıGaz» AQ men avstrııalyq «OMV» kontserni arasynda ózara túsinistik jóninde memorandýmǵa qol qoıyldy.
Qazaqstan Prezıdenti QR men EO arasyndaǵy ǵylymı-tehnologııalyq ınnovatsııalyq áriptestik máseleleri boıynsha Eýroodaqtyń mamandarymen kezdesti.
Joǵary mazmundylyqpen erekshelenetin bıylǵy resmı sapar eki el arasyndaǵy saıası, saýda-ekonomıkalyq jáne mádenı-gýmanıtarly áriptestikti nyǵaıtýǵa baǵyttalǵan. Budan bólek, taraptar halyqaralyq kún tártibindegi ózekti máselelerdi qozǵady.
