Elbasynyń atyna jazýshylar Sh. Murtaza, N. Dáýtaıuly jáne Jambyl oblysynyń ákimi Q. Bozymbaevtan quttyqtaý hat keldi
ASTANA. 3 jeltoqsan. QazAqparat. Memleket basshysynyń atyna kórnekti jazýshy Sherhan Murtaza men Qazaqstannyń eńbek sińirgen qaıratkeri, jazýshy Nesipbek Dáýtaıulynan jáne Jambyl oblysynyń ákimi Qanat Bozymbaevtan hat kelip tústi,
dep habarlaıdy Elbasynyń baspasóz qyzmeti.
Hat avtorlary EQYU-nyń VII Sammıtiniń qorytyndylaryna degen zor qanaǵattanýshylyq sezimderin bólise otyryp, osynaý halyqaralyq forýmda Astana Deklaratsııasynyń qabyldanýy Otanymyzdyń abyroı-bedelin taǵy da bıiktete túskenin maqtanyshpen baıandaıdy.
Óz hatynda Qazaqstannyń halyq jazýshysy Sh.Murtaza: «2010 jyldyń 2 jeltoqsany qazaq tarıhyna enetin kún. Bul Táýelsizdiktiń 19 jylynyń mártebeli bıigi. Qazaqtyń qaperine kirip pe edi mundaı mártebe, buryn-sońdy. Túsine de enbegen. Armandap ta kórmegen. Endi, mine, Aıyń týyp ońyńnan, Kúniń týyp solyńnan deıtin baqytty kúnge jettik. Endeshe, Prezıdent Nursultan Nazarbaevty - azamat erdiń balasy asyp týǵan, - demegende, ne deımiz», dep tolǵanady.
Kórnekti jazýshy, Qazaqstannyń eńbek sińirgen qaıratkeri Nesipbek Dáýtaıulynyń hatynda elimizdiń EQYU-ǵa tóraǵa bolýyna jáne joǵary deńgeıdegi EQYU-nyń Sammıtin tabysty ótkizýge, sonyń nátıjesinde tarıhı máni zor Astana Deklaratsııasynyń qabyldanýyna álemdik deńgeıdegi qaıratker, Elbasy N.Á.Nazarbaevtyń zor úles qosqany atap ótilgen. Odan ári N.Dáýtaıuly «Bul tarıhqa Nursultan Nazarbaevpen birge tutastaı qazaq degen halyqtyń kemeńgerligi men kisiligi bolyp enedi. Muny Táýelsizdiktiń jetkizgen uly jeńisi, qazaq halqynyń jasampazdyǵy dep bilemiz», deıdi.
Jambyl oblysynyń ákimi Qanat Bozymbaev óz hatynda «Asa mártebeli Nursultan Ábishuly! Biz, jambyldyqtar, EQYU Sammıti jumysynyń qorytyndalaryn orasan qanaǵattanýshylyq sezimmen qabyldadyq. Bul joǵary deńgeıdegi kezdesýler Sizdiń kóp jaqty saıasatyńyzdyń kóregendiligi men aıqyndylyǵyn, álemdik qoǵamdastyqtaǵy Qazaqstannyń bedelin taǵy da qýattap berdi», dep jazady. Q.Bozymbaev Jambyl oblysynyń jurtshylyǵy Astana Sammıtiniń tabysty ótkenine asa qýanyshty ekenin jetkizip, Elbasy N.Á.Nazarbaevqa zor densaýlyq jáne el múddesi jolyndaǵy qyzmetine tabys tilegen.
