Elbasynyń atyna tikeleı jelide kelip túsken suraqtardyń 2 myńnan astamy mádenıet jáne aqparat salalaryn qatysty - M. Qul-Muhammed
A. Qarashanyń 18-i. QazAqparat /Qanat Mámetqazyuly/ ‑ Búgin QR Mádenıet jáne aqparat mınıstrliginiń keńeıtilgen alqa májilisi ótti. Basqosýda Memlet basshysynyń atyna tikeleı efır barysynda kelip túsken mádenıet jáne aqparat salalarynyń ózekti suraqtary jáne osy sala boıynsha Elbasynyń júktegen tapsyrmasy týraly másele talqylandy,
dep habarlaıdy QazAqparat.
«Ózderińizge belgili, jaqynda ótken Memleket basshysynyń tikeleı jeli barysyndaǵy suhbatyna el azamattary tarapynan 40 myńnan astam saýal kelip tústi. Elbasy 2 saǵat 50 mınýtqa sozylǵan tikeleı efırde 50-den astam suraqtar men ótinishterge jaýap qatty. Degenmen, az ǵana ýaqyttyń ishinde barlyq saýaldarǵa jaýap berý múmkin emestigi anyq. Sondyqtan da Elbasy Úkimet basshysyna, barlyq mınıstrlikter men agenttikterge, ulttyq kompanııalar basshylaryna tikeleı tapsyrma bergen bolatyn. Tikeleı efır barysyndaǵy QR Prezıdentiniń tapsyrmalary mádenıet jáne aqparat salalaryn da qamtydy. Jalpy, Prezıdenttiń atyna tikeleı jelide kelip túsken suraqtardyń eki myńnan astamy mádenıet jáne aqparat salalaryn qatysty bolyp tabylady», dedi jıynda sóz sóılegen QR Mádenıet jáne aqparat mınıstri Muhtar Qul-Muhammed.
Mınıstr óz sózinde kelip túsken saýaldarǵa jalpylama sholý jasap ótti. Onyń aıtýynsha, kóptegen qazaqstandyqtar ekonomıkalyq daǵdarystyń mádenıet mekemelerine, mass-medıaǵa qanshalyqty áser etkendigi jaıly saýal tastaǵan. «Elbasynyń, Úkimettiń qoldaýy arqasynda mádenıet jáne aqparat salasy aǵymdaǵy jyly tolyq aýqymda qarjylandyryldy. Memleket basshysynyń Joldaýyna sáıkes barlyq mádenıet jáne aqparat salasy qyzmetkerleriniń jalaqysy jyl basynan beri 25 paıyzǵa artty. Bul árıne, bizdiń qyzmetkerler úshin úlken qoldaý. Ásirese, memlekettik uıǵyr, nemis, koreı teatrlaryndaǵy, «Saltanat» bı ansamblindegi, «Aq jaýyn» kameralyq orkestrindegi ujymdarda jalaqy mólsheri eki esege deıin ósti. Sondaı-aq 2010 jylǵy shildeniń 1-nen bastap, bıýdjettik sala qyzmetkerleriniń jalaqysy taǵy 25 paıyzǵa, 2011 jyly taǵy 30 paıyzǵa ósetini josparlanǵan. Bunyń ózi Memleket basshysynyń jalpy bıýdjet qyzmetkerlerine degen naqty qamqorlyǵynyń aıqyn aıǵaǵy», dedi M. Qul-Muhammed.
