Elbasynyń atyna halyq tarapynan túsken saýaldardyń sany 19 myńǵa jetti
sp;ASTANA. Qarashanyń 9-y. QazAqparat /Arman Asqarov/ - QR Prezıdenti Nursultan Nazarbaevtyń tikeleı jeli arqyly halyqpen tildesýine oraı Astanada jumys istep jatqan Baılanys ortalyǵyna osy ýaqytqa deıin 19 myńǵa jýyq saýal kelip tústi,
dep habarlaıdy QazAqparat.
Áli kúnge deıin halyqty jıi mazalap júrgen saýaldardyń qatarynda halyqty áleýmettik qorǵaý jáne turǵyn-úı máselesi, odan keıin zań buzý jáne bilim berý salasyndaǵy problemalar keledi. Baılanys ortalyǵyna habarlasyp jatqan azamattardyń basym bóligi elimizdegi zeınetaqy júıesin qaıta qaraýdy, múgedekterge kórsetiletin áleýmettik kómekti ulǵaıtýdy, kelesi jyldan bastap memlekettik qyzmetshilerdiń jalaqysyn kóterýdi, sot jáne quqyq qorǵaý júıesindegi jemqorlyq áreketter men bilim berý salasyndaǵy kóptegen kemshilikterdi joıýdy surap otyr. Sondaı-aq halyq tarapynan san alýan taqyryptaǵy usynystar túsýde. Máselen, Qaıyrjan Isqaqov Astana qalasynda álem dinderiniń Shtab ortalyǵyn qurýdy usynsa, astanalyq Orazbekova Qaınysh, Bıjanova Aınagúl jáne Orazbekova Altynaı qazaqtyń qolóner ortalyǵyn ashý qajettigi týraly aıtyp otyr. Al Jánibek esimdi azamat elimizde at ústindegi polo sııaqty sport túrin damytýdy usynady. Onyń paıymdaýynsha, Qazaqstan halqy bul sportta úlken jetistikterge qol jetkize alady.
Esterińizge sala keteıik, 2009 jyly qarashanyń 13-i kúni Qazaqstan Respýblıkasynyń Prezıdenti N.Nazarbaev «Qazaqstan», «Habar», «Astana qalalyq teledıdary» telearnalary jáne «Qazaq radıosy», «Astana radıosy» boıynsha ótetin tikeleı efırde azamattardyń teleefır, telefon ınternet jáne SMS habarlamalary arqyly túsken suraqtaryna jaýap beretin bolady. Suraqtardy respýblıka boıynsha +7 (7172) 555-777 telefony men KCell, Beeline, Neo, Altel uıaly baılanysyn paıdalanýshylar úshin SMS habarlamalary arqyly 1111 nómirine jiberýge bolady. Sondaı-aq
www.line.gov.kz saıtynyń tıisti tarmaǵyn paıdalana otyryp, beınesuraqty joldaýǵa bolady. Al jazbasha saýaldy vopros@akorda.kz elektrondyq mekenjaıyna jiberýge múmkindik bar.
Aıta keteıik, «Qazaqtelekom» usynǵan baılanys tegin bolsa, uıaly telefondarǵa arnaıy tólemder qarastyrylǵan. «Tikeleı jeli» kezinde Elbasynyń nazaryna ilikpeı qalǵan saýaldarǵa tıisti memlekettik organdar bir aıdyń kóleminde jaýap ázirlep, saıtqa ornalastyratyn bolady. Al Interneti joq aýyldy jerler úshin ákimdikter janynan qoǵamdyq qabyldaý bólimderi ashylǵan.
