Elbasynyń álem ýnıversıtetterinde oqyǵan dárister jınaǵy jaryq kórdi
Jınaqty Elbasy kitaphanasy QR Tuńǵysh Prezıdenti – Elbasy keńsesiniń basshysy, saıası ǵylymdar doktory, professor Mahmut Qasymbektiń jetekshiligimen ázirlegen.
Onda Nursultan Nazarbaevtyń 1991-2018 jyldary otandyq jáne sheteldik ýnıversıtetterde, ǵylymı ortalyqtar men ulttyq akademııalarda oqyǵan dáristeri bar. Dárister mazmuny ulttyq jáne álemdik tarıhtyń mańyzdy oqıǵalaryn qamtıdy, óńirlik jáne jahandyq qaýipsizdiktiń jańa kórinisteri men qazaq memlekettiliginiń qurylýy men damýy jazylǵan.
«Elbasynyń sarabdal saıasatynyń arqasynda bilim jáne ǵylym salasy úlken jetistikterge qol jetkizdi. Búgin tusaýy kesilgen dárister jınaǵynda bilim salasynda jasalǵan barlyq jumys pen memleketti damytý týraly aqparat bar. Bul kitapty barlyq oqý oryndaryna taratamyz. Meniń oıymsha, joǵary oqý oryndarynyń bilim berý baǵdarlamasy aıasynda da bul kitapty qoldanýǵa bolady. Sondyqtan biz úshin bul – úlken jumys, úlken senim», - dedi QR Bilim jáne ǵylym mınıstri Ashat Aımaǵambetov kitaptyń tusaýkeserinde.
Elbasy kitaphanasynyń dırektory Ámirhan Rahymjanovtyń aıtýynsha, ǵylymı izdenispen aınalysyp júrgen qyzmetkerler sońǵy 2-3 jylda 20-dan astam kitap shyǵardy. Onyń kópshiligi Elbasy keńsesiniń basshysy Mahmut Qasymbektiń jetekshiligimen jaryq kórgen.
Qazaqstannyń joǵary oqý oryndaryna tabystaý úshin bul kitapty Ámirhan Rahymjanov Bilim jáne ǵylym mınıstri Ashat Aımaǵambetovke berdi.
Aıta keteıik, QR Tuńǵysh Prezıdenti – Elbasy kitaphanasy men QR Bilim jáne ǵylym mınıstrligi yntymaqtastyq memorandýmyn bekitti. Bul qujat kitaphana men mınıstrliktiń birlesken mádenı-aǵartý jáne ǵylymı-zertteý jobalaryn júzege asyrýǵa, zertteý baǵdarlamalaryn, ǵylymı-praktıkalyq is-sharalar, konferentsııa, forým, semınarlar uıymdastyrýǵa múmkindik beredi.
