Elbasynyń 5 bastamasy ekonomıkaǵa tyń serpin bermek - senator
Senat depýtaty oqý ornynyń ujymymen kezdesip, ózekti máselelerdi talqylady.
Jumys sapary barysynda Baqytjan Jumaǵulov oqý ornynyń ujymyna memleket basshysynyń 5 áleýmettik bastamasyn júzege asyrý tetikteri týraly túsindirdi.
«Birinshi kezekte meni oqý protsesi, tárbıe jumystary qalaı uıymdastyrylǵany alańdatady. Men óz saparym barysynda Memleket basshysynyń bıylǵy Joldaýyn túsindirýdi aldyma maqsat etip qoıdym», - dedi Senat depýtaty.
Onyń aıtýynsha, búginde eń ózekti ári eń kóp talqylanyp jatqan másele - Elbasynyń 5 áleýmettik bastamasy úndeýiniń qalaı júzege asatyndyǵy bolyp otyr.
«Bul shyn máninde úlken áleýmettik joba. Biz óz tarapymyzdan bul tetikterdi túsindirý, halyqtyń oıyn, pikirin, ózekti máselelerin jınaýǵa tıispiz. Búgin bizdiń ekonomıkamyz bul áleýmettik jobalardy júzege asyrýǵa tolyq múmkindik beredi. Qazirgi ýaqytta elimizde jataqhana máselesi ózekti. Tipti Almaty, Astana stýdentterine jataqhana jetispeıdi. Bul baǵdarlamanyń bas operatory QR BǴM janyndaǵy Qarjy ortalyǵy bolyp otyr. Bul jobanyń arqasynda el ekonomıkasyna, qurylys salasyna da tyń serpin beriletini anyq. Bul ekonomıkaǵa mýltıplıkatıvtik effekt bermek», - dedi Senator.
Baqytjan Jumaǵulov óz kezeginde oqý ornynyń materıaldyq-tehnıkalyq bazasyn aralap, oqytý protsesin baqylady.
Sonymen qatar, zań shyǵarýshy organ ókili oqý ornynyń oqytýshy-professorlar quramymen kezdesip, olardyń ózekti usynystaryn tyńdady.
«Mamandar daıarlaý Elbasy kótergen bastamadan kórinis tabatyn asa mańyzdy másele. Bıyl qosymsha osy maqsatta 20 000 grant bólinedi. Sonyń ishinde 11 000 grant tehnıkalyq mamandyq boıynsha taratylady», - dedi B.Jumaǵulov.
Aıta ketý kerek, Elbasy 5 naýryzda «Prezıdenttiń bes áleýmettik bastamasy» atty halyqqa úndeýin jarııalaǵan bolatyn.
QR Parlament depýtattary atalǵan úndeýdiń júzege asý tetikteri men zań-normatıvtik bazasyn daıarlaý maqsatynda óńirlerdi aralap, túsindirý jumystarymen aınalysyp jatyr.
