Elbasyna óz qolymnan shyqqan aıaq kıimdi syılaǵym keledi - qostanaılyq etikshi
QOSTANAI. QazAqparat - Qostanaı oblysy Amangeldi aýdanynda turatyn jas kásipker Saıat Qýanyshev Elbasy Joldaýyn qalaı qabyldaǵany, sondaı-aq, týǵan jerindegi shaǵyn jáne orta bıznestiń damýy jóninde aıtyp berdi, dep habarlaıdy QazAqparat.
Saıat Qýanyshev - aıaq kıim jóndeýshi. Ol «Eńbek» nátıjeli jumyspen qamtýdy jáne jappaı kásipkerlikti damytýdyń 2017 - 2021 jyldarǵa arnalǵan baǵdarlamasy boıynsha Amangeldi aýdanynda jeke kásibin ashty.
Onyń aıtýynsha, bıylǵy Joldaýda shaǵyn jáne orta bızneske aıtarlyqtaı basymdyq berilgen.
«Prezıdent otandyq kásiporyndarǵa halyq kóp tutynatyn taýarlardy shyǵarýǵa kómektesý kerektigin aıtty. Rasynda da, ishki naryq óz ónimderimizben toltyrylsa, básekege qabiletti elderdiń qataryna ený údesinen shyǵamyz. Men Elbasynyń otandyq kostıýmderdi kıetinin burynnan biletinmin. Aldaǵy ýaqytta shaǵyn kásibimdi dóńgelentip, naryqqa shyǵarý josparda bar», - deıdi Saıat Qýanyshev.
Jas kásipker etik jóndeýmen 9-synyptan bastap aınalysady. Qazir ol aýdan ortalyǵyndaǵy «Nuraı» turmys úıinde jumysyn júrgizedi. Aty atalǵan turmys úıi Amangeldi aýdanynyń 90 jyldyǵy qarsańynda ashyldy. Joba quny - 8,5 mln. teńge.
«Bastapqyda aıaq kıimderdi úıde jóndep keldim. Tapsyrys az boldy. Qazir turmys úıinen bir bólme aldym. Turǵyndar burynǵydaı etikshilerdi ár jerden izdemeıdi. Bizge barynsha jaqsy jaǵdaılar jasalǵan. Otandyq ónimderdi shyǵaratyn ýaqyt jetti. Qarjy bolsa, bar jumystan qashpaǵan jón», - deıdi etikshi.
Saıat Qýanyshev osy jumysymen toqtap qalǵysy joq. Jaqynda «Atameken» kásipkerler palatasynyń «Bastaý-Bıznes» baǵdarlamasyna qatysty. Jumysyn sátti qorǵasa, grant utyp alýǵa múmkindigi zor.
«Elbasy osy Joldaýynda otandyq ónimderge degen suranysty arttyrýdy tapsyrdy. Shynynda da shaǵyn jáne orta bıznes - el ekonomıkasynyń negizgi tiregi. Bizdiń Amankeldi aýdanynda da shaǵyn bızneske jol ashyq. Joldaýda bızneske qatysty óte jaqsy usynystar aıtyldy. Onyń barlyǵy qabyldanyp, júzege asady dep senemiz. Men «Bastaý-Bıznes» baǵdarlamasynyń grantyn utyp alsam, qajetti qurylǵylar satyp alýǵa nıettimin. Tigin mashınasy, stanoktar qajet. Máselen, qazirgi ýaqytta bir aıaq kıimdi aınaldyryp tigip shyǵý úshin 1,5 saǵat ýaqyt kerek», - dedi ol.
Saıattyń sózinshe, etikshi - ekiniń biri qoly bara bermeıtin kásip túri. Etik tigý sheberlik pen asa yjdahattylyqty qajet etedi. Sondaı-aq, ol óziniń armandarymen bólisti.
«Tańnan qas qaraıǵanǵa deıin biz ben jipti janyna serik qylatyn etikshilerdiki naǵyz eńbek. Jasyratyny joq, qazirgideı zamanda etikshilik kásibine mensinbeýshilikpen qaraıtyndar bar. Eki qolǵa bir kúrek taba almaı otyryp, etikshi bolýdan arlanatyndarǵa qaıran qalamyn. Bilgenge, bul - naǵyz tabystyń kózi. Bastysy adal eńbekpen paıda tabý mańyzdy. Bolashaqta Elbasyna óz qolymnan shyqqan aıaq kıimdi syılaǵym keledi», - deıdi Saıat Qýanyshev.
Eske salaıyq, Prezıdent bıylǵy Joldaýynda óńdeý ónerkásibi men shıkizatty emes eksportty qoldaýǵa qosymsha 500 mlrd teńge bólip berýdi tapsyrdy.
https://kaz.inform.kz/news/nursultan-nazarbaev-sheteldin-kiimderin-satyp-aludy-dogaru-kazhet_a3411304
Al Ulttyq bank ekinshi deńgeıli bankterge 600 mlrd teńge bóletin bolady. Ol aqsha otandyq ónimderdi shyǵarý jobalaryna jumsalady.
