Elbasyna Memlekettik qyzmettiń jaǵdaıy týraly ulttyq baıandama tanystyryldy

ASTANA. QazAqparat -  Memlekettik qyzmet isteri jáne sybaılas jemqorlyqqa qarsy is-qımyl agenttigi alǵash ret Memlekettik qyzmettiń jaǵdaıy týraly ulttyq baıandamany daıyndap, ony Memleket basshysynyń nazaryna usyndy, dep habarlaıdy QazAqparat tilshisi.

Bul týraly Ortalyq kommýnıkatsııalar qyzmetinde ótken baspasóz máslıhatynda agenttik tóraǵasynyń orynbasary Aıgúl Shaıymova málim etti.

«Ulttyq baıandamada memlekettik qyzmettiń jaǵdaıy men táýelsizdik jyldaryndaǵy damý kezeńderi, onyń bolashaqtaǵy damý joly týraly aıtylǵan. Bıyl Ulttyq baıandama tuńǵysh ret Memleket basshysynyń qaraýyna usynylyp, maquldaýǵa ıe boldy», - dedi spıker.

Aıgúl Shaıymovanyń aıtýynsha, Ult jospary júzege asyryla bastaǵan ýaqyttan beri qyzmettegi mansap satysymen ósip kele jatqan memlekettik qyzmetshiler sany 4 ese ósken.

Júrgizilgen áleýmettik saýalnamalardyń nátıjelerine súıensek, respondentterdiń 77 paıyzynan astamy kadrlyq sheshimder shyǵarýda merıtokratııaǵa senetinderin aıtqan. Al 2011 jyly bul kórsetkish 39 paıyzdy quraǵan.

Aýqymdy aldyn alý jumystarynyń nátıjesinde ádep normalaryn buzǵandardyń ótken jylǵy kórsetkishteri 2015 jylmen salystyrǵanda 43 paıyzǵa azaıǵan.

«Sarapshylardyń pikiri boıynsha, qazirgi  qazaqstandyq memlekettik qyzmet halyqaralyq standarttarǵa sáıkes keledi. Tipti keıbir jerlerde onyń basymdyǵy da bar», - deıdi Aıgúl Shaıymova.