Elbasyna «Qurmetti Senator» mártebesiniń berilýi Parlamenttiń abyroıyn asyrady - Álı Bektaev
«Qurmetti Senator» mártebesin berý zamanaýı Qazaqstannyń negizin qalaýshy, qos palataly Qazaqstan parlamentarızminiń negizin salǵan jáne onyń damýyna teńdessiz úles qosqan, elimizdiń birligi men yntymaǵyn qamtamasyz ete otyryp, strategııalyq damý baǵdaryn aıqyndaǵan QR Tuńǵysh Prezıdenti - Elbasy N. Nazarbaevtyń sińirgen tarıhı eńbegin moıyndaýdyń taǵy da bir belgisi bolyp tabylady. Qazaqstan táýelsizdik alǵan alǵashqy jyldary óte qıyn ótpeli kezeńnen ótti. Qazaqstannyń derbes memleket bolyp ketetinine kúmán keltirgender de az bolǵan joq. Zamanaýı memleket qurýdyń bar aýyrtpashylyǵyn da, jaýapkershiligin de óz moınyna alǵan Nursultan Nazarbaev bolatyn. Sol kezdegi basynan ótken qıyndyqtardy tek Elbasynyń ózi ǵana biledi. Qanshama saıası teketirester, ekonomıkalyq qarama-qaıshylyqtar bolyp jatty. Aıaqtan shalý men kedergiler de az bolǵan joq. Sonyń barlyǵyna tótep bergen de, qıynnan qıystyra jol tapqan da Qazaqstannyń Tuńǵysh Prezıdenti edi», - dedi senator Parlament Senatynyń jalpy otyrysynda.
Sonymen qatar ol SSSR-den bólingen táýelsiz memlekettter arasynda jalǵyz Qazaqstan ǵana óziniń shekarasyn halyqaralyq deńgeıde tolyq zańdastyryp alǵanyn atap ótti. Ortalyq Azııa elderinen bólek, kórshiles Reseı arasyndaǵy 7 800 shaqyrym, Qytaı Halyq Respýblıkasymen aradaǵy 1 800 shaqyrym shekaranyń bekitilýin qazaq halqy úshin, Táýelsiz Qazaqstan úshin baǵa jetpes tarıhı jeńis dep te aıtýǵa bolady. Bunyń barlyǵy Elbasynyń úlken erik-jigeri men dıplomatııalyq kóregendiginiń, kórshi elder basshylarymen jasaǵan adamı qarym-qatynasynyń, dostyq qasıetiniń arqasy.
«Búginde Nursultan Nazarbaevtyń - búkil álem moıyndaǵan qaıratker ekendigine eshkimniń kúmáni joq. Alpaýyt memleketter basshylarynyń bizdiń Elbasyn, alaqandaryna salyp, tóbesine kóterýi búkil qazaq halqyna, táýelsiz Qazaqstanǵa kórsetilgen qurmet dep esepteýimiz kerek», - dedi Álı Bektaev.
«Sondyqtan da Qazaqstannyń Tuńǵysh Prezıdenti - Elbasy Nursultan Nazarbaevqa kúlli álem bas ıip, qurmet kórsetip otyrǵanda bizdiń búgingi qabyldaıtyn sheshimimiz teńizge tamǵan tamshydaı ǵana ekendigi anyq. Biraq Elbasyǵa «Qurmetti Senator» mártebesiniń berilýi QR Parlamenti Senatynyń abyroıyn asyryp, bizdiń barlyǵymyzǵa, Senat depýtattaryna qosymsha jaýapkershilik júkteıtini daýsyz», - dedi ol.
Budan buryn habarlanǵandaı, búgin QR Parlamenti Senatynyń jalpy otyrysynda Tuńǵysh Prezıdent-Elbasy Nursultan Nazarbaevqa «Qurmetti Senator» mártebesi berildi.
