Elbasymyzdyń latyn álipbıine qatysty Jarlyǵy mańyzdy oqıǵa - Túımebaev
«Keshe Elbasymyz qabyldaǵan latyn álipbıine kóshý týraly Jarlyǵyn Qazaqstan Respýblıkasyndaǵy eń úlken oqıǵanyń biri dep aıtýǵa bolady. Bul latyn álipbıin qoldanýdy biz jańadan bastap jatqan joqpyz. Ótken ǵasyrdan tájirbıemiz bar. 1929-1940 jyl arasynda bizdiń ákelerimiz ben atalarymyz osy jazýdy qoldanǵan bolatyn. Mine, Prezıdentimiz osy qaripke kóshýdi qaıta jańǵyrtyp, usynylǵan latyn álipbıiniń jańa nusqasyn bekitti», - dedi aımaq basshysy.
Sonymen qatar, Janseıit Túımebaev jańa álipbıdi qoldanysqa engizý boıynsha júrgiziletin jumystarda kedergiler bolmaıtynyn aıtyp ótti.
«Bizdiń tarıhymyzda kóne túrki jazýy, arab jazýy, latyn jazýy bári basymyzdan ótti. Al qazirgi jastarymyz aǵylshyn alfavıtin jaqsy meńgerip alǵan. Sondyqtan da bul tájirıbeni de biz ıgere alamyz. Bizde eshqandaı qıyndyq týyndamaıdy, úırenemiz. Bul bizdiń elimizdiń rýhanı jańǵyrýyndaǵy jańa qadam dep esepteýge bolady. Elbasymyzǵa osy latyn álipbıine kóshý týraly bastamasy úshin alǵasymyzdy bildiremiz», - dep sózin túıindedi ákim.
Jıynǵa «Intellekt Orda» halyqaralyq áleýmettik-gýmanıtarlyq zertteýlerdi yqpaldastyrý ınstıtýtynyń bas dırektory, tarıh ǵylymynyń doktory, professor, akademık - Sattar Májitov, Abylaı han atyndaǵy halyqaralyq qatynastar jáne álem tilderi ýnıversıtetiniń pedagogıka ǵylymdarynyń doktory, professor, akademık - Dına Júsibalıeva, D.A.Qonaev atyndaǵy Eýrazııalyq zań akademııasynyń professory, fılologııa ǵylymynyń doktory, akademık - Gúlmıra Bilıalova, «Áleýmettik zertteýler jónindegi áıelder qaýymdastyǵy» QB prezıdenti, Abylaı han atyndaǵy Halyqaralyq qatynastar jáne álem tilderi ýnıversıtetiniń kafedra dotsenti, áleýmettik ǵylymdarynyń kandıdaty, akademık - Tamara Klımova, T.Júrgenov atyndaǵy qazaq ulttyq óner akademııasynyń , «Qazaqstan tarıhy jáne áleýmettik ǵylym» kafedrasynyń dotsenti, tarıh ǵylymynyń kandıdaty - Mendyǵanym Shaımerdenova jáne 12 sarapshylar men ǵalymdar qatysyp otyr.
Sonymen qatar, kezdesýde taraptar Ońtústik Qazaqstan oblysynda rýhanı jańǵyrý boıynsha arnaıy jobalardyń iske asyrylýy men onyń qazaqstandyq jáne halyqaralyq deńgeıde nasıhattalý jaıyn sóz etti.
Aıta keteıik, Ońtústik Qazaqstan oblysynda «Bolashaqqa baǵdar: rýhanı jańǵyrý» maqalasynyń aıasynda iske asatyn jobalar «Intellekt-ekspert» áleýmettik-ekonomıkalyq zertteýler ortalyǵynyń ókilderimen birge júzege asatyn bolady. Olar oblysta etnosaralyq qarym-qatynasty, rýhanı qundylyq pen mádenıettiń tabıǵatyn, óńirdiń mıgratsııalyq, ıaǵnı kóshi-qon protsesteri men qoǵamdyq sanany jańǵyrtý joldaryn halyqaralyq tájirıbege súıene otyryp zertteý jáne saraptaý jumystaryn júrgizetin bolady. Ótetin is-sharalarǵa álemdik jáne qazaqstandyq tájirıbeleri mol ǵalymdar men sarapshylar jáne Ońtústik Qazaqstan oblysynyń mamandary qatysady.
