#Elbasyjanemen heshtegimen 500-ge jýyq fotosýret jarııalandy

ASTANA. QazAqparat - QR Tuńǵysh prezıdenti kúnine arnalǵan «Elbasy jáne men» respýblıkalyq fotobaıqaýyna ótinimder qabyldanyp jatyr, dep habarlaıdy QazAqparat Astana ákimdiginiń resmı saıtyna silteme jasap.

Ásirese jastar jobaǵa úlken qyzyǵýshylyq tanytyp otyr. #elbasyjanemen heshtegimen 446 post jarııalanǵan.

«Árbir jazbanyń ózindik ereksheligi bar. Jastar Elbasymen alǵashqy kezdesýi týraly, qobaljý men keýdeni kernegen maqtanysh sezimi týraly jazǵan. Birge túsken fotosýreti joq bolsa da, keı jastar Prezıdenttiń portretimen sýretke túsken. Barlyq ótinimdi arnaıy komıssııa qaraıdy», - dep habarlandy elorda ákimdiginiń resmı saıtynda.

Ákimdiktiń habarlaýynsha, baıqaýǵa ázirge 125 qatysýshy tirkelgen.

Eske sala ketsek, 1 jeltoqsan - Tuńǵysh Prezıdent kúnine arnalǵan baıqaýǵa Elbasymen birge túsken fotolar 2018 jyldyń 14-30 qarashasy aralyǵynda qabyldanady.

Baıqaý sharty boıynsha, qatysýshy Elbasy N.Nazarbaevpen túsken sýretin óziniń Instagram  paraqshasyna #ElbasyJaneMen heshtegimen jarııalap, kezdesýden alǵan áserin jazýy tıis.

Sonymen qatar, Qoǵamdyq damý mınıstrliginiń @kdm.gov.kz jáne mınıstrlikke qarasty jastar jáne otbasy isteri komıtetiniń @kdms.gov, sondaı-aq, Astana qalasynyń qoǵamdyq damý jónindegi basqarmasynyń @qogamdyk_damy_astana atty Instagram paraqshalaryna tirkelip, óz paraqshasynda olardy belgileýi kerek.

QR Qoǵamdyq damý mınıstrliginiń telegram-kanalynda eń kóp daýys jınaǵan fotosýret ıesi baıqaý jeńimpazy atanady. 

Fotobaıqaý nátıjesi 1 jeltoqsan kúni Astanadaǵy iri saýda ortalyqtarynyń birinde jarııalanady. Jeńimpazdarǵa Іphone x, Іpad jáne taǵy basqa baǵaly syılyqtar beriledi. Odan bólek, ádilqazy alqasynyń tańdaýymen úzdik degen 50 foto arnaıy kórme galereıasyna qoıylady.