Elbasyǵa Quryq portyndaǵy mýltımodaldyq kólik haby tanystyrylady
Osy aıtýly sharaǵa onnan astam elden kelgen kólik-logıstıkalyq kompanııalardyń ókilderi qatysýda. Olardyń arasynda Ázerbaıjan, Iran, Qytaı, BAÁ, Reseı, Tájikstan, Túrkimenstan, Túrkııa, Ózbekstan jáne basqa da elderdiń mamandary bar.
Aıta keteıik, Quryq porty Kaspıı teńiziniń shyǵys jaǵalaýynda ornalasqan. Aýa raıynyń qolaılylyǵyna baılanysty portta qysy-jazy toqtaýsyz avtokólik pen temirjol paromy jumys isteıdi. Kaspıı teńizi arqyly batys baǵdarda eksporttyq áleýetti kúsheıtý úshin parom qyzmetin qoldaný jaıy Memleket basshysynyń 2014 jylǵy 11 qarashadaǵy «Nurly jol -Bolashaqqa bastar jol» atty Joldaýynda aıtyldy. «Nurly jol» memlekettik baǵdarlamasynyń sınergııalyq jobasy Quryq portynda qosarlanǵan tehnologııalyq ınfraqurylymdy jasaqtaýǵa múmkindik berdi. Borjaqty-Ersaı temirjol jelisi salynyp, port aıdynyna tireldi. Qazirgi kezde Aqtaý men Quryq portyn jalǵaıtyn úshinshi tehnıkalyq kategorııadaǵy eki jolaqty joly salynýda. Sonymen qatar, Atyraý- Astrahan joly salynýda. Bul eki joldy salýdaǵy maqsat - Ózbekstan, Reseı, Qytaımen júk jetkizý merzimin azaıtyp, taýar aınalymyn kúsheıtý. Bul el ekonomıkasyn damytýda jańa múmkindikterge jol ashady. Joba aıasynda Aqtaý portynyń soltústik jaǵalaýyn keńeıtý kezinde úsh termınaldyq nysan iske qosyldy. Bul óz kezeginde basty júkterdi ótkizý kólemin eki esege ósirdi.
Esterińizde bolsa, Quryq portyndaǵy ótkizý kesheni nysandarynyń qurylysy 2015 jyly sáýirde bastaldy. 2016 jylǵy 6 jeltoqsanda Memleket basshysynyń qatysýymen ótkizilgen Jalpyulttyq telekópir kezinde porttyń alǵashqy ótkizý kesheni men temirjol joly iske qosyldy.
«Quryq porty bizdi Kavkaz ben Eýropaǵa shyǵarady. Bul - bizdiń jańǵyrtýdy damytýdaǵy kópten kútken jobamyz»,-dep atap ótti N. Nazarbaev.
Al 2017 jylǵy 6 jeltoqsanda Jalpyulttyq telekópir kezinde Quryq portyndaǵy Avtokólik aılaǵy men avtomobıl paromyna arnalǵan gıdrotehnıkalyq ǵımarat testilik rejimde iske qosyldy.
2017 jyly 19 qazanda Quryq portynyń temirjol paromy termınaly alǵashqy mıllıon tonna júkti ótkizdi. 2017 jyly 1,5 mıllıon tonna júk ótkizilip, 320 keme portqa kirgen. 2017 jyly jeltoqsanda Quryq portynda «Ázerbaıjan Kaspıı teńiz keme kóligi» JAQ Ro-Ro tıpindegi «Bıastıakar Gara Garaev» kemesimen jeńil jáne júk avtokólikteri ótkizildi. Parom kesheni astyq, munaı ónimderi, tyńaıtqysh, hımııalyq zattar men basqa da júkterdi ótkize alady. Munda bıylǵy 7 aıda 1,2 mıllıon tonna júk ótkizilgen.
Port aýmaǵynda 4 aımaq bar: túsirý-tıeý kesheniniń operatsııalyq jumys orny, tehnologııalyq operatsııa óndiristik aımaǵy, jalpy porttyq nysandar aımaǵy jáne jolaýshylarmen jumys aımaǵy.
