Elbasyǵa Astanadaǵy jańa meshittiń jáne qalanyń syrt aımaǵynyń sáýlettik jobalary usynylmaq
ASTANA. Mamyrdyń 25-i. QazAqparat /Jasulan Amanbaıuly/ - Búgin Elbasy Nursultan Nazarbaevqa Astanada ótip jatqan Túrki álemi sáýletshileri men qala qurylysshylarynyń ІІІ-shi quryltaıy aıasynda Astanadaǵy jańa meshittiń jáne qalanyń syrt aımaǵynyń sáýlettik jobalary usynylmaq. Bul týraly búgin quryltaı barysynda «AstanaBasJospar» MQK bas sáýletshisi Sársembek Júnisov málim etti,
dep habarlaıdy QazAqparat.
Búgin Quryltaıdyń tústen keıin ótetin jalpy otyrysynda Qazaqstan Prezıdenti N.Nazarbaev jáne Túrkııa Prezıdenti Abdolla Gúl qatysady dep kútilýde. Qazaqstan jáne Túrkııa prezıdentteriniń nazaryna Túrkııa sáýletshileri men Qazaqstan mamandarynyń jobalaýymen jasalǵan 5 myńǵa arnalǵan meshit pen qalanyń syrtqy aımaǵynyń bolashaq qurylysynyń maketteri usynylmaq.
Eske sala keteıik, Astana qalasynda salynýy tıis atalmysh nysandardyń jobalaýyna baılanysty sáýletshiler arasynda halyqaralyq baıqaý ótken bolatyn. QR Premer-Mınıstri Kárim Másimovtiń jáne Astana ákimi Imanǵalı Tasmaǵambetovtiń qatysýymen ótken QR Prezıdenti janyndaǵy Sáýlettik keńesiniń otyrysynda usynylǵan 57 jumystyń ishinen 2-3 eń úzdik degeni iriktelip, Elbasynyń nazaryna usyný kózdelgen edi.
Sonymen qatar, búgin álemniń 30 elinen jınalǵan sáýletshilerdiń quryltaıynda 100-den astam ınjenerlik jáne ǵylymı turǵyda bekitilgen jobalardyń kórmesi ashyldy. Mamyrdyń 27-sine deıin ótetin osynaý forýmda TMD elderiniń ulttyq sáýletshiler odaqtary uıymynyń ǵalymdary iriktelgen jumystardy jáne Astana qurylysynyń negizgi sheshimderine qatysty talqylaýlar ótkizedi.
Halyqaralyq deńgeıde ótkiziletin Túrki álemi sáýletshileri men qala qurylysshylarynyń quryltaıy bıyl alǵash ret Astanada ótkizilýde. Bul sheshimdi 2008 jyly Ankarada Halyqaralyq túrki mádenıeti men ónerin damytý uıymy jáne Qazaqstan men Túrkııa elderiniń sáýletshiler men qala qurylysshylarynyń odaǵy qabyldaǵan bolatyn. Bunyń aldynda forým eki márte Túrkııada bolǵan. Quryltaıdyń uıymdastyrýshylary kelesi kezekti quryltaıdy Tatarstanda ótkizýge nıetti.
