«Elbasy jylýy» qaıyrymdylyq jobasy 15 shildege deıin jalǵasady
QR Tuńǵysh Prezıdenti-Elbasynyń bastamasymen uıymdastyrylǵan shara Taraz, Taldyqorgan, Oral qalalary men Almaty jáne Aqmola oblystarynda da qolǵa alynyp, 1000 otbasyny qamtydy.
Іs-shara aıasynda muqtaj otbasylarǵa un, kartop, jemis, kúrish, qaraqumyq, sháı, qant, kúnbaǵys maıy sııaqty azyq-túlik pen gıgıenalyq zattar berildi.
Qaıyrymdylyq sharasyna ilikken ár otbasy 130 kelige deıin taýar alyp otyr.
«Nursultan Nazarbaev qory men «Degdar» qaıyrymdylyq qory qajet taýarlardy Aqmola, Almaty oblystarynyń az qamtylǵan turǵyndaryna jáne Taraz, Taldyqorǵan qalalarynda turatyn ál-aýqaty tómen jandarǵa jetkizip úlgerdi. Koronovırýs pandemııasy kezinde kóp adamdar jumystarynan aıyrylyp qaldy. Kóp otbasylardyń jalaqasy belgili bir mólsherde qysqaryp, bul jaǵdaı olardyń áleýmettik ál-aýqatyna tikeleı áser etti. Osy oraıda biz «Elbasy jylýy» ıdeıasyn qolǵa alyp, ony qarqyndy júzege asyrýdamyz. Bul qaıyrymdylyq is-shara shildeniń 15-ine deıin jalǵasyn tabady», - deıdi Nursultan Nazarbaev qory atqarýshy dırektorynyń orynbasary Álkeı Marǵulanuly.
«Degdar» qorynyń dırektory Laýra Ahmetova bolsa, «Elbasy jylýy» jobasynyń áleýmettik mán-mańyzy zor ekenin aıtyp otyr.
«Jalpy, bul aktsııa ekinshi ret ótkizilip jatyr. Alǵash ret joba osy jyldyń sáýirinde uıymdastyrylǵan edi. Osy ýaqyt aralyǵynda biz bul jobanyń qoǵam úshin qanshalyqty mańyzdy ekendigine kóz jetkizdik. Biz árdaıym qamqorlyqqa muqtaj, júrek jylýyna zárý jandarǵa kómektesýga daıynbyz»,- dedi qor jetekshisi.
Áleýmettik turǵydan osal otbasylarǵa taratylatyn azyq-túlik taýarlarynyń jalpy salmaǵy – 120 tonna.
Jobaǵa Nursultan Nazarbaev qory men «Degdar» qaıyrymdylyq qorynan bóek LIDER KZ volonterlik qozǵalysy atsalysyp júr.
Aıta keteıik, mamyr aıynda osy joba aıasynda Almatyda turmysy tómen otbasylarǵa azyq-túlik taratylǵan bolatyn.
