Elbasy jumys saparymen Mańǵystaý óńirinde boldy
ASTANA. QazAqparat - Memleket basshysy Nursultan Nazarbaev jumys saparymen Mańǵystaý oblysynda boldy. Elbasy ózara tıimdi yntymaqtastyqtyń keń aýqymdy máseleleri talqylanyp, baýyrlas eki el arasyndaǵy barys-kelis, alys-beristiń ulǵaıa túsýine jol ashatyn ýaǵdalastyqtar jasalǵan, ekijaqty qarym-qatynasty odan ári damytý maqsatynda strategııalyq mańyzǵa ıe birlesken málimdeme qabyldanǵan Kaspıı jaǵalaýyndaǵy ejelgi kórshimiz Ázerbaıjan Respýblıkasyna resmı saparynan keıin munaıly óńirdiń tynys-tirshiligimen tanysyp, oblys jurtshylyǵymen júzdesti.
Jer qoınaýy qazynaǵa toly Mańǵystaý oblysy - elimizdiń áleýmettik-ekonomıkalyq damýyna qomaqty úles qosyp otyrǵan óńirlerdiń biri. Túbektiń baılyǵyn el ıgiligine asyrý jolyndaǵy eren eńbek búginde tabıǵaty qatal ólkeniń ajaryn ashyp, tyń serpinmen damýyna, oń ózgeristerdiń ornyǵýyna, eldiń ál-aýqatynyń artyp, turmys-tirshiliktiń jaqsara túsýine jol ashty. Qalalar men aýyl-aımaqtyń bet-beınesi ózgerdi, sán-saltanaty artty. Oqý-bilim, eńbekpen qatar buqaralyq sport qanat jaıdy. Osy jerde byltyr oblysta 14 jańa sporttyq nysan paıdalanýǵa berilgendigin, aldaǵy ýaqytta taǵy da 5 nysan qurylysy bastalatyndyǵyn aıta ketken jón. Munyń bári óńirde óndiriletin munaıdy halyq ıgiligine aınaldyrý jolyndaǵy maqsatty istiń nátıjesi ekeni anyq.
Qazynaly óńirge jumys sapary barysynda Elbasy atbasyn aldymen Aqtaý qalasyndaǵy «Mańǵystaý-Arena» sport saraıyna tiredi.
Memleket basshysyna kópbeıindi sport kesheniniń áleýeti týraly oblystyq deneshynyqtyrý jáne sport basqarmasynyń basshysy B.Baıjanov baıandap berdi. Alyp keshendi aralap, kórgen Elbasy oblys jastarymen jáne sportshylarymen kezdesti.
Olardyń arasynda qysqa qashyqtyqqa júgirýden KSRO-nyń birneshe dúrkin jeńimpazy, rekordshy Á.Tuıaqov, bokstan álem chempıonattary jáne Olımpıada oıyndarynyń kúmis júldegeri Á.Nııazymbetov, sondaı-aq tanymal sportshylar, jattyqtyrýshylar men sport ardagerleri bar.
Sportshylar jan-jaqty qoldaýy men qamqorlyǵy úshin Memleket basshysyna alǵys bildirdi.
Mańǵystaýlyqtardyń kózaıym qýanyshyna aınalǵan, 2,5 ga jerge ornalasqan alyp sport kesheni demeýshilerdiń qarajatyna salynǵan. Onda fýtbol, basketbol, voleıbolmen shuǵyldanýǵa, sondaı-aq jekpe-jek saıysymen jáne jeńil atletıkamen aınalysýǵa arnalǵan zaldar bar.
Óńirdiń damýynda ulan-ǵaıyr aýmaqty alyp jatqan «Aqtaý teńiz porty» arnaıy ekonomıkalyq aımaǵynyń mańyzy zor. Qurylǵan kezeńnen bergi ýaqyt ishinde arnaıy aımaq aýmaǵynda 236 mlrd teńgeniń ónimi óndirilip, 84 mlrd teńge ınvestıtsııa tartylǵan, bıýdjetke salyq retinde 20,8 mlrd teńge túsip, 1023 turaqty jumys orny ashylǵan. Munda tirkelgen 30 jobanyń búginde 15-i júzege asyryldy. Bıyl 11 joba júzege asyrylýda, taǵy 4 jobany iske qosý josparlanǵan.
Memleket basshysy osy sapary barysynda arnaıy ekonomıkalyq aımaqtaǵy áleýetti jobalardyń biri - jýyrda iske qosylǵan «Azersýn» óndiris jáne logıstıka ortalyǵynda bolyp, jumysshylarmen kezdesti.
4,2 ga jerdi alyp jatqan ortalyqtyń jumysymen tanysyp, óndiristik taýarlar, jemis-jıdek pen kókónis saqtalatyn qoımalardy aralap kórdi. Jeri negizinen shóldi jáne shóleıtti bolyp keletin Mańǵystaý óńiri úshin kókónis pen jemis-jıdektiń túr-túrin syrttan, ásirese, teńiz joldary arqyly Ázerbaıjan elinen tasymaldaýǵa «Azersýnnyń» kómegi zor bolmaq. Molynan ákelingen kókónister arnaıy qoımalarda saqtalyp, saýda oryndaryna jetkizilip otyrylady.
«Aqtaýdaǵy logıstıka ortalyǵynyń qyzmeti azyq-túlik ónimderi baǵasyn arzandatýǵa baǵyttalǵan. Mańǵystaý oblysymen qatar, respýblıkamyzdyń basqa da óńirlerindegi azyq-túlik baǵasyn tómendetip, onymen qamtamasyz etý maqsatymen taýarlardy saqtaý, jetkiziletin kólemin arttyrý jóninde sharalar qabyldaý qajet», - deı kelip, Elbasy ortalyq qyzmetkerleriniń jumysyna tabys tiledi.
Memleket basshysy budan keıin osy arnaıy ekonomıkalyq aımaqta ornalasqan Aqtaý teńiz soltústik termınalynda bolyp, Kaspıı teńizindegi kólik ınfraqurylymynyń damýymen tanysty. Kaspııdegi kólik-logıstıka salasynyń damýy men baǵytttary týraly «Qazaqstan temir joly» UK» AQ prezıdenti Q.Alpysbaev baıandap berdi. 2020 jylǵa qaraı barlyq porttyń, sonyń ishinde Aqtaý soltústik teńiz termınalynyń qýattylyǵyn aıtarlyqtaı arttyrý josparlanyp otyrǵany aıtyldy. Sondaı-aq «Jibek joly» júk tıeý kesheniniń jumysy týraly baıandaldy.
