Elbasy «Juldyzaı» festıvaliniń gala-kontsertine qatysýshylardy quttyqtady (FOTO)
ASTANA. QazAqparat - Astanada «Qazaqstan» ortalyq kontsert zalynda dástúrli 10-shy respýblıkalyq «Juldyzaı» balalar shyǵarmashylyǵy festıvaliniń gala-kontserti ótýde.
Balalardy qorǵaý kúnine oraılastyrylǵan festıvalge jyl boıy 8 myńnan astam bala qatysqan bolatyn. Búgin onyń 300-ge jýyq jeńimpazy men laýreattary basty kontserttiń sánin keltirýde.
Gala-kontsertti ashqan QR Premer-Mınıstriniń orynbasary Berdibek Saparbaev Qazaqstan Prezıdenti Nursultan Nazarbaevtyń arnaıy joldaǵan quttyqtaý sózderin oqyp berdi.
«Meniń jas dostarym! Sizderge jáne táýelsiz Qazaqstannyń barlyq balalaryna shynaıy kóńil men ystyq yqylasymdy bildiremin. Balalar - elimizdiń basty baılyǵy. Sizderdiń bolashaqtaryńyz qandaı bolatyny bizderge - úlkenderge baılanysty. Biz sizderdiń densaýlyqtaryńyzdyń myqty bolǵanyn, jaqsy bilim alyp, úsh tildi bilgenderińizdi, aǵa býynǵa qamqor, elimizdiń naǵyz patrıoty bolyp óskenderińizdi qalaımyz», - delingen Elbasy quttyqtaýynda.
Memleket basshysy «búginde Qazaqstan aldyna zor maqsat - álemniń eń damyǵan elderiniń qataryna qosylý mindeti turǵandyǵyn» eske saldy.
«Árkim óz armanyna jetkize alatyn qoǵam quryp jatyrmyz. Ol úshin naqty is-qımylǵa arnalǵan baǵdarlamalarymyz bar. Olarda jas urpaqqa qamqorlyq jasaýǵa aıryqsha kóńil bólingen. Biz árdaıym sizderdiń jan-jaqty jetilýlerińiz, bilim men tálim-tárbıe alýlaryńyz úshin jaǵdaı jasaýǵa tyrystyq. Talantty jas qazaqstandyqtar álemniń eń úzdik ýnıversıtetterinde bilim alý úshin «Bolashaq» baǵdarlamasy qabyldandy. Bizdiń respýblıkamyzda da halyqaralyq deńgeıdegi mektepter men ýnıversıtetter ashyldy. Memleketimiz jetim balalardy jebeý úshin kóp jumys atqarýda. Taıaýdaǵy úsh jylda biz olardyń jetimdik kórmeýine qol jetkizýdi kózdep otyrmyz», - delingen N.Nazarbaevtyń quttyqtaýynda.
Búgingi sharaǵa oblystyq týr jeńimpazdary, respýblıkalyq «Juldyzaı» balalardyń shyǵarmashylyq festıvaliniń talantty balalarymen qatar, kontsertte 5 maýsym kúni ótkeli otyrǵan «MÝZ TV: Gravıtatsııa» syılyǵynyń ókilderi: premııa nomınanty Qaırat Nurtas, Dıana Gýrtskaıa (Reseı), sondaı-aq «open air» kontserttik baǵdarlamasynyń qatysýshylary: Serik Ibragımov pen «Asyl» toby qatysýda.
