Elbasy júktegen tapsyrmalardy oryndaýǵa bar kúshimizdi saldyq - Saǵyntaev jyldy qorytyndylady
ASTANA. QazAqparat - Úkimet basshysy Baqytjan Saǵyntaev jyldy qorytyndylap, Memleket basshysynyń tapsyrmasyn oryndaýda belsendi jumys júrgizgen áriptesteriniń bárine alǵys aıtty, dep habarlaıdy QazAqparat tilshisi.
Búgingi Úkimet otyrysynda Ulttyq ekonomıka mınıstri Tımýr Súleımenov 1 qańtardan bastap kommýnaldyq tarıfterdiń tómendeıtinine baılanysty baıandama jasady.
«PIK, qoqys shyǵarý, lıft qyzmetterine tarıfterdi tómendetýge qatysty tapsyrmańyzdy oryndaý úshin búgingi tańda osy qyzmetter boıynsha tarıfter barlyq óńirlerde tómendetildi. Baǵalar mynadaı kórinis tabady: PIK qyzmetterine 2,2 paıyzdan 20 paıyzǵa deıin, qoqys shyǵarý qyzmetterine 1-24,7 paıyzǵa deıin, lıft qyzmetterine 3-50 paıyzǵa deıin (...) Sonymen qatar, mınıstrlik «Qaztransgaz» AQ-pen birlesip, qosymsha taldaý negizinde Atyraý jáne Qyzylorda halqy úshin gazǵa bólshek saýda baǵalaryn tómendetý boıynsha ýaǵdalastyqqa qol jetkizdi. Tapsyrmalaryńyz oryndaldy», - dedi Tımýr Súleımenov.
Mınıstrdiń baıandamasyn tyńdaǵan Úkimet basshysy «ıAǵnı, barlyq oblystarda tarıfter tómendedi me?» dep surady.
«Barlyq aımaqta tómendettik», - dedi Ulttyq ekonomıka mınıstri.
Baqytjan Saǵyntaev osydan keıin 1 qańtardan bastap jaýapty organdardyń bárine tarıfterdiń máselesin baqylaýǵa alýdy surady.
«Osy baǵytta jumysty ary qaraı jalǵastyratyn bolamyz. Kelesi jyly, Tımýr Muratuly, Ulttyq bankpen birge aldaǵy jylǵy ınflıatsııanyń dálizin qaraǵan kezde tabıǵı monopolııalardyń sýbektileriniń úles salmaǵyn anyqtaýymyz qajet», - dedi Baqytjan Saǵyntaev.
Úkimet basshysy sóz sońynda búgingi Úkimet otyrysy bıylǵy jyly sońǵy bolǵandyqtan, áriptesteriniń barlyǵyn kele jatqan jańa jyl merekesimen quttyqtady.
«Bıylǵy jyldy tabysty aıaqtap, Elbasy júktegen barlyq tapsyrmalardy abyroımen oryndaý úshin biz bar kúsh-jigerimizdi saldyq dep esepteımin. Elbasy óziniń BAQ-qa bergen suhbatynda jyldy 4 paıyzdyq ósimmen aıaqtaý múmkindigimiz baryn aıtyp ótti. 11 aıdyń qorytyndysy boıynsha 4,1 paıyzdyq qorytyndymen aıaqtadyq. Kóptegen jumys atqaryldy. Sondyqtan, Úkimet múshelerine, ákimderge, holdıngter men kompanııa basshylaryna, qoǵamdyq uıym basshylary, bizdiń jumysymyzdy jetkizýde belsendi jumys atqarǵan buqaralyq aqparat quraldaryna alǵysymdy bildiremin. Jańa 2019 jyly barshamyzǵa tabys, zor densaýlyq, otbasylaryńyzǵa jaqsylyq ákelsin», - dep sózin túıindedi Premer-Mınıstr.
