Elbasy Joldaýynyń basty ıdeıasy daǵdarys sabaqtaryn esepke ala otyryp damýǵa negizdeledi - O. Sábden
ASTANA. Aqpannyń 19-y. QazAqparat /Qanat Mámetqazyuly/ - Elbasy Joldaýynyń basty ıdeıasy daǵdarys sabaqtaryn esepke ala otyryp damýǵa negizdeledi. Búgin QR Parlamenti Májilisi janyndaǵy Qoǵamdyq palatanyń otyrysynda «Ekonomıkany ártaraptandyrý - tabysqa jetýdiń kilti» taqyrybynda baıandama jasaǵan palata múshesi ekonomıka ǵylymdarynyń doktory Orazaly Sábden osylaı málim etti,
dep habarlaıdy QazAqparat.
«Qazirgi jahandyq qarjylyq-ekonomıkalyq daǵdarys álemdik ekonomıkanyń basqarý úlgisinde oryn alǵan tujyrymdamalyq kemshilikterdi áshkerelep otyr. Buny moıyndap qana qoımaı, odan birqatar sabaqtar alǵan lázim. Birinshiden, búgingi naryqtyq ekonomıka naǵyz ońtaıly úlgi emes ekendigin, bunyń áleýmettik-ekonomıkalyq júıeniń jetkilikti jetilgen túri bolmaǵanyn moıyndaý qajet. Bul zamanaýı kapıtalızmdi memlekettiń retteýinsiz, memlekettiń ekonomıkalyq qyzmetin belsendirýsiz júrgizý múmkin emes degendi bildiredi. Biz osyndaı sabaqty jaqynda ǵana ıgerdik. Atap aıtqanda, Elbasynyń Qazaqstan Respýblıkasyndaǵy memlekettik josparlaý júıesi týraly jarlyǵy shyqty. Endigi másele ony júzege asyrýshylarǵa, atqarýshy jáne zań shyǵarýshy bılikterdiń ózara ońtaıly áreketterine baılanysty bolmaq. ıAǵnı, bar másele adamı faktorǵa kelip tireledi. Bul múmkindikti durys paıdalana bilý shart», dedi O. Sábden.
Sonymen birge, daǵdarystyń ekinshi bir sabaǵyna toqtalǵan O. Sábden, bul turǵyda tutyný ıdeologııasynyń qaýqarsyzdyǵyna nazar aýdartty. «Eger ónim shyǵarmaı, ómir boıy tek aqsha jumsaýǵa baılanyp qalýdyń saldary qaýipti bolatynyn da moıyndaıtyn kez jetti. Bundaıda syrt memleketterdiń qaryz usyný nıeti de tómendeıdi. Degenmen, osy jaǵdaıda ártaraptandyrý sharasyn ishki ınvestıtsııa arqyly júrgizýge bolady. Rasynda, Qazaqstanda qarajat jetkilikti, endeshe buny naqty jolǵa, ishki rynokty ıgerýge qaraı jumsaý qajet. Daǵdarystyń úshinshi sabaǵy - ekonomıkany basqarýdaǵy memlekettiń rólin moıyndaýǵa qatysty bolyp tabylady. Bunyń ózi retteýdi tek ulttyq ekonomıka ǵana emes, halyqaralyq ekonomıkalyq qatynastar da qajet etetindigin bildiredi. Bálkim bul másele EQYU-ǵa tóraǵalyq etetin Qazaqstanǵa qoıylyp jatýy da múmkin», dedi O. Sábden.
