Elbasy Joldaýyndaǵy 10 baǵyttyń árqaısysynyń ózindik orny bar - M.Áshimbaev
ASTANA. 27 qańtar. QazAqparat /Aıdar Ospanalıev/ - «Elbasy Joldaýyndaǵy 10 baǵyttyń árqaısysynyń ózindik orny bar.
Onyń ishindegi eń bastysy azamattardy jumyspen qamtý dep bilemin», - deıdi Májilis depýtaty Máýlen Áshimbaev. Bul pikirin ol búgin Parlament palatalarynyń birlesken otyrysynan soń jýrnalısterge bergen suhbatynda aıtty.
M.Áshimbaevtyń oıynsha, Joldaýdaǵy quqyq qorǵaý organdaryn attestatsııalaý sharasy kóp shyǵyndy qajet etpeıdi. «Degenmen bul - óte ózekti másele. Búgingi qoǵam ókilderiniń arasynda quqyq qorǵaý salasy qyzmetkerleriniń biliktilikteri talapqa saı emes degen syńaıdaǵy pikirler bar. Sondyqtan Memleket basshysy da quqyq qorǵaý organdaryn nyǵaıtýdyń aldynda olardyń qyzmetine, quramyna taldaý jasaý qajet dep otyr. Árıne, quqyq qorǵaý salasynyń qyzmetkerleriniń barlyǵy biliksiz deýge kelmeıdi. Onda óz mindetin minsiz atqaryp júrgen adal azamattar da bar. Al attestatsııalaý sharasy óz qyzmetine salǵyrt qaraıtyn azamattardy irikteýge múmkindik beredi», - dedi depýtat.
